کەشناسی هەرێم: بارانی بەلێزمە و تەم بەردەوامی دەبێت

SNN

بەڕێوەبەرایەتی کەشناسی و بومەلەرزەزانی هەرێم رایگەیاندووە، کەشی ئەمڕۆ هەوری تەواو دەبێت و بارانی مامناوەند دەبارێت، سبەینێش رێژەی بارانەکە زیاتر دەبێت، کەشناسێکیش دەڵێت “لەگەڵ باران بارین خۆڵبارینیش دەستپێدەکاتەوە”.

ئەمڕۆ یەکشەممە 8ی شوبات، بەڕێوەبەرایەتیی کەشناسی و بومەلەرزەزانیی هەرێمی کوردستان رایگەیاند، ئەمڕۆ یەکشەممە، ئاسمانی ناوچەکانی هەرێمی کوردستان هەوری تەواو دەبێت، کاریگەریی ئەو شەپۆلی بارانبارینەی رووی لە ناوچەکانمان کردووە بەشێوەی  نمەباران و بارانی مامناوەند بەردەوامدەبێت، بەڵام بەراورد بە دوێنێ کاریگەریی بارانەکە کەمێک لاوازتردەبێت، ئەگەری دروستبوونی تەم هەیە لە هەندێک کاتدا، پلەی گەرمیش بەراورد بە دوێنێ کەمێک بەرزدەبێتەوە”.

لەبارەی کەشی سبەینێ دووشەممەوە ئاشکرایکردووە، کاریگەریی شەپۆلی بارانبارین لە ناوچەکانمان، بۆ سبەینێ زیاتردەبێت، کەشی ناوچەکانمان هەوری تەواودەبێت و بارانبارین لە سەرجەم ناوچەکان دەبارێت، رێژەی دابارین لە سنووری ئیدارەکانی، سۆران، راپەڕین و زاخۆ زیاتردەبێت، هەندێک کات باران بەشێوەی بەلێزمە دەبارێت، لە سەنتەری پارێزگاکانی سلێمانی، کەرکوک، هەڵەبجە و هەولێر بارانبارین بەشێوەی پچڕپچڕ بەردەوامدەبێت و لە هەندێک کات ئەگەری روودانی هەورەبرووسکە هەیە، لە هەندێک کاتیش خێرایی با دەگاتە سەروو 30 کیلۆمەتر لە کاتژمێرێکدا.

هاوکات، پشتیوان پێنجوێنی کەشناسیش جەختدەکاتەوە، باران بارین بەردەوامی دەبێت و سبەینێ و دووسبەی ئەگەر هەیە خۆڵبارین ڕووبکاتە بەشێکی ناوچەکانی هەرێمی کوردستان ، لە 14 بۆ 16ی مانگ شەپۆلێکی گەرمای لاواز ڕوودەکاتە ناوچەکانمان، لە ڕۆژانی سەرەتای مانگی ڕەمەزانی پیرۆز 18 بۆ 20ی مانگ شەپۆلێکی دیکەی باران بارین ڕوودەکاتە ناوچەکانمان، لە ناوچە شاخاوییە بەرزەکان و ناوچە سنورییەکان بەفر دەبارێت و هاتنی بارستە هەوای ساردی نوێ بۆ ناوچەکانمان دەبێت.