میدیای عێراقی: رەغەدی كچی سەدام حسێن لە دیمەشق لەگەڵ ئەحمەد شەرع كۆبووەتەوە

SNN

رێكخەری گشتیی پارتی رزگاریی نیشتمانی لە سوریا ئاشكرای دەكات كە رەغەدی كچی سەدام حسێن،، چووەتە دیمەشقی پایتەختی سوریا و چاوی بە ئەحمەد شەرع، سەرۆكی كاتیی سوریا كەوتووە.

بە گوێرەی هەواڵێكی ماڵپەڕی (بغداد الیوم) كە ئەمڕۆ دووشەممە9ی شوباتی2026بڵاوی كردووەتەوە، مەحموود موالدی، رێكخەری گشتیی پارتی رزگاریی نیشتمانی لە سوریا، لە میانی پۆدكاستێكدا رای گەیاندووە: ”بەپێی ئەو زانیارییانەی كە پێمان گەیشتووە لە سەرچاوەی باوەڕپێكراوەوە، رەغەد سەدام حسێن چاوی بە ئەحمەد شەرع كەوتووە، ئەمەش بە چاودێریی هەواڵگریی بەریتانیا، پرۆسەكەش لە لایەن هەواڵگریی ئوردنەوە جێبەجێ كراوە.“

ئەوەشی خستووەتە ڕوو كە لە كۆبوونەوەكەدا دوو بازرگانی ئوردنی و حەفت ئەفسەری پێشووی سوپای عێراق بەشدار بوون.“

باسی لەوەش كردووە كە وەزیری دەرەوەی سوریا و سەرۆكی هەواڵگریی سوریاش لە كۆبوونەوەكەدا بەشدار بوون.

هەرچی پەیوەندیی بە ئامانجی ئەم كۆبوونەوەیەوە هەیە، ئەوەی خستووەتە ڕوو كە كۆبوونەوەكە جێی پرسیارە، بەڵام هیچ وردەكارییەكی دیكەی لەمبارەیەوە نەخستووەتە ڕوو.

ئەمە لە كاتێكدایە كە تاوەكوو ئێستا نە حكوومەتی سووریا، نە رەغەد سەدام حسێن و حزبی بەعسی قەدەغەكراو، هیچ زانیارییەكیان لەمبارەیەوە رانەگەیاندووە.