محەممەد شیاع سوودانی و نووری مالیکی کۆبوونەوە

SNN

درەنگانی شەوی ڕابردوو، محەممەد شیاع سوودانی، سەرۆکوەزیرانی عێراق و نووری مالیکی، سەرۆکی هاوپەیمانی دەوڵەتی یاسا کۆبوونەوە. لە دیدارەکەدا دوایین گۆڕانکارییە سیاسییەکانی وڵات و پرسی هەڵبژاردنی سەرۆککۆمار لە پەرلەمان و کاندیدی سەرۆکوەزیرانی داهاتوو تاوتوێ کران..

هەماهەنگیی هێزە نیشتمانییەکان
بەگوێرەی ڕاگەیێنراوێکی نووسینگەی ڕاگەیاندنی سەرۆکوەزیرانی عێراق، ئامانجی کۆبوونەوەکە بەهێزکردنی هەماهەنگیی نێوان هێزە نیشتمانییەکان بووە. هەردوولا جەختیان لەسەر پێویستیی تەواوکردنی ڕێکارە یاسایی و دەستوورییەکان کردووەتەوە بۆ تێپەڕاندنی چەقبەستوویی سیاسی.

ڕێککەوتنی سیاسی بۆ هەڵبژاردنی سەرۆککۆمار
لە بەشێکی دیکەی دیدارەکەدا، سوودانی و مالیکی جەختیان لەسەر گرنگیی گەیشتن بە ڕێککەوتنێکی سیاسی گشتگیر کردەوە. ئەم ڕێککەوتنە بە مەبەستی ئاسانکردنی پڕۆسەی هەڵبژاردنی سەرۆککۆمارە لەناو هۆڵی پەرلەمان، کە دەرئەنجام ڕێگە بۆ پێکهێنانی کابینەی نوێی حکومەتی عێراق خۆش دەکات.

خزمەتگوزاری و گەشەپێدانی ئابووری
سەرۆکوەزیرانی عێراق لە دیدارەکەدا دووپاتی کردەوە کە حکومەت بەردەوام دەبێت لە هەوڵەکانی بۆ دابینکردنی خزمەتگوزارییەکان و گەشەپێدانی ئابووری. سوودانی ئاماژەی بەوە کرد کە وەڵامدانەوەی داواکارییەکانی هاووڵاتییان لەم قۆناغە هەستیارەدا لە کارە لەپێشینەکانی دامەزراوەکانی دەوڵەت دەبێت.