گەرمایەکی نائاسایی عێراق و ناوچەکە دەگرێتەوە و کەشناسی زەنگێک بۆ ڕەمەزان لێدەدات

SNN

لە دیمەنێکی کەشوهەوای “دەگمەن و نائاسایی”دا، لەبری سەرمای چاوەڕوانکراوی شوبات، شەپۆلێکی گەرمای بەهێز باڵی بەسەر عێراق و نیمچە دوورگەی عەرەبیدا کێشاوە، ئەمەش لە کاتێکدایە، دەستەی کەشناسیی عێراق پێشبینی دەکات سیناریۆکە لەگەڵ هاتنی مانگی ڕەمەزاندا بە تەواوی پێچەوانە بێتەوە.

دەستەی گشتیی کەشناسی و بوومەلەرزەزانیی عێراق، لە نوێترین راپۆرتیدا بۆ میدیاکان ئاشکرای کردووە، ناوچەکە رووبەڕووی “شێواوییەکی کەشوهەوا” بووەتەوە.

دەستەکە رایگەیاندووە، لە کاتێکدا دەبوو ئێستا عێراق لە لووتکەی سەرمای زستاندا بێت، بەڵام شەپۆلێکی گەرمای فراوان نەک تەنها عێراق، بەڵکو تورکیا، ئێران و رۆژهەڵاتی ئەفریقاشی گرتووەتەوە.

بەپێی نەخشە کەشوهەواییەکان، ئەم “گەرمییە توندە” تا کۆتایی ئەم مانگە بەردەوام دەبێت، بەڵام گۆڕانکارییە گەورەکە لەگەڵ دەرکەوتنی مانگی ڕەمەزاندا روودەدات.

کەشناسی جەخت دەکاتەوە، ئاماژەکان پێمان دەڵێن، کە ئەم گەرمایە کاتییە و سەرەتای مانگی ڕەمەزانی پیرۆز بە کەشێکی سارد و جیاواز دەست پێدەکاتەوە، کە رەنگە گەڕانەوە بێت بۆ سەرمای دواکەوتووی زستان.”