وەزارەتی دارایی هەرێم لەبارەی مووچەوە راگەیەنراوێکی بڵاوکردەوە

وەزارەتی دارایی و ئابووری هەرێمی کوردستان ئاشکرای دەکات، نوسراویکیان ئاڕاستەی حکومەتی فیدراڵی کردووە بۆ خەرجکردنی ئەو کورتهێنانەی لە مووچە هەیە، دەشڵێت، هەر کەموکوڕییەک لە مووچەی سێ ساڵی ڕابردوودا ڕوویدا بێت، عێراق بەرپرسیارە.

یاسای بودجەی سێ ساڵە
وەزارەتی دارایی و ئابووری، سەبارەت بە مووچەی مانگی یەکی ئەمساڵەوە، ڕوونکردنەوەیەکی بڵاوکردەوە و دەڵێت، بەپێی یاسای بودجەی سێ ساڵە، مووچەی هەرێمی کوردستان تێکڕا لەبەغداوە خەرج کراوە.

کەموو کوڕییەکانی مووچە بەغدا لێی بەرپرسیارە
دەشڵێت، هەر کەموکوڕییەک لە مووچەی فەرمانبەرانی هەرێمی کوردستان، نەناردن یان لێبڕین لەو سێ ساڵە ڕویدا بێت، وەزارەتی دارایی عێراق لێی بەرپرسیارە.

بڕین لە مووچەی مانگی کانوونی دووەم
ئاماژەی بەوەشکردووە، لەگەڵ گەیشتنی تەمویلی مووچەی مانگی کانوونی دووەمی ئەمساڵ، یەکەم لایەن بووین ڕامانگەیاند، وەزارەتی دارایی حکومەتی فیدراڵ زیاتر لە 36 ملیار دیناری لە تەمویلی مووچەی ئەو مانگە بڕیوە و نەیناردووە.

کورتهێنانەکە چییە؟
وەزارەتی دارایی و ئابووری ئاماژەی بەوەشکردووە، ئەو کورتهێنانە بریتیە لە مووچەی چەند مانگێکی خانەنشینانی سەربازی، شارستانی و کەمئەندامی سەنگەر، خانەنشین هەیە ١٢ مووچەی وەرنەگرتووە، بەڵام تەنیا یەک مووچەی بۆ هاتووە، کەمئەندامانی سەنگەر پێویست بوو دوو مووچە وەربگرن، یەکێكیان مووچەی مانگی ١٠ـی ساڵی ڕابردوو لەگەڵ مووچەی مانگی یەکی ئەمسال، بەڵام تەنیا یەک مووچەیان بۆ هاتووە.

“بەدواداچوونی مووچە ئەرکی خۆمانە”
وەزارەتی دارایی و ئابووری جەختلەوە دەکاتەوە، بەدواداچوون بۆ مووچەی فەرمانبەران و مووچەخۆرانی هەرێمی کوردستان بە ئەرکی خۆی دەزانێت، ڕۆژی پێنجشەممە نووسراوی دووەمیان ئاڕاستەی وەزارەتی دارایی حکومەتی فیدراڵ کردووە و داوای خەرجکردنی بڕی زیاتر لە 36 ملیار دینارەکەیان کردووەتەوە، کە لە مووچەی مانگی یەکدا نەنێردراوە.