نرخی گۆشتی سوور گران بوو، SNNهۆكارەكەی ئاشكرا دەكات

عەلی حەمە سەعید-SNN

لەگەڵ نزیك بوونەوە لە هاتنی مانگی پیرۆزی ڕەمەزان، نرخی گۆشتی سوور و هەروەها نرخی ئاژەڵ گران بووە، بەوتەی ئاژەڵدار و گۆشتففرۆشان، بەهۆی ڕاگرتنی هاوردەكردنی ئاژەڵ لە سوریا و ئێرانەوە هاوكات زۆر بوونی خواست، نرخی گۆشتی سور و ئاژەڵ بەرز بووەتەوە، بەجۆرێك هەر كیلۆیك دوو هەزار دیناری ڕۆشتووەتەسەر.

ستار مەحمود، یەكێك لە بازرگانانی هاوردەكردنی ئاژەڵ بە SNNی ڕاگەیاند: پێشتر لە سوریاوە بە ئاسانی ئاژەڵی گەورەو بچوك هاوردە دەكرا، هاوكات لە ئێرانیشەوە بە پێی پێویست ئاژەڵمان هاوردە دەكرد، بەڵام ماوەیەكە لە سوریا بەتەواوی هاوردەكردنی ئاژەڵ ڕاگیراوە و هاوكات لە ئێرانیشەوە بڕێكی زۆر كەم هاوردە دەكرێت.

ئاماژەی بەوەشكرد، ئەو ئاژەڵانەی كە ئێستا لەناوخۆی هەرێم هەن بەشی پێداویستی ناوخۆ ناكەن، هاوكات بەشێكی زۆری ئاژەڵدارانیش ئامادەنین لەم وەرزەدا ئاژەڵەكانیان بفرۆشتن كە وەرزی زاوزێی ئاژەڵەكانیانە بەتایبەت ئاژەڵی گەورە، هەموو ئەمانە وایكردووە كە نرخی ئاژەڵی زیندزووو گران ببێت.

ڕەفیق سابیر، یەكێك لە گۆشتفرۆشانی هەڵەبجە بە SNNی ڕاگەیاند: نرخی ئاژەڵ گرانبوونی بەرچاوی بەخۆیەوە بینیوە، بەجۆرێك پێشتر مەڕ بە زیندە قەپان لە نزیكی شەش هەزار دینار دەمانكڕی، ئەمڕۆ بە نۆ هەزار و 250 دینار كڕیومانە، هەروەها ئاژەڵی گەورەش لە حەوت هەزارەوە بۆ نزیكی نۆ هەزار گران بووە، ئەمە وایكردووە كە گۆشتی بەرخ لە 19 هەزار دینارەوە بۆ 22 هەزار و گۆشتی مەڕ و بزن لە 18 هەزارەوە بۆ 20 هەزار و 500 دینار بەرز ببێتەوە.