بڕیاری بە قەزابوونی ناحیەی گوڵاڵە پەسەند کرا

SNN

وەزارەتی پلاندانانی عێراق بڕیاری بەقەزاکردنی گوڵاڵەی دەرکرد و ژمارەی دانیشتووانەکەی بە زیاتر لە 130 هەزار کەس دیاریکردووە.

ئەمڕۆ دووشەممە 23ی شوبات، ئەمڕۆ خالید بەتال، وەزیری پلاندانانی عێراق بەوەکالەت فەرمانێکی دەرکرد بۆ بەقەزاکردنی گوڵاڵە لە سنووری پارێزگای دیالە و ژمارەی سیمبوولی کارگێڕیی پێدراوە کە 21101 دەبێت لە ریزبەندیی یەکە کارگێڕییەکانی عێراق.

هاوکات، ژمارەی دانیشتووانی قەزاکە بە 94 هەزار کەس خەمڵێندراوە و 40 هەزار کەسی دیکەی دانیشتووی ناحیەی سەعدییەش دەخرێتە سەر ژمارەی دانیشتووانی قەزاکە.

لە 31ی کانوونی دووەمی 2024، ئەنجوومەنی پارێزگای دیالە دەنگی دا بۆ بەقەزاکردنی ناحیەی گوڵاڵە و لایەنە کوردستانییەکان دژی وەستانەوە، لەهەمان کاتدا زۆرینەی ئەنجوومەنی پارێزگای دیالە داوا لە وەزارەتی پلاندانانی عێراق دەکەن بەقەزاکردنی گوڵاڵە رابگرێ کە ناوچەیەکی جێناکۆکە.

شێرکۆ میروەیس، بەرپرسی مەڵبەندی خانەقینی یەکێتیی نیشتمانیی کوردستان، لەوبارەیەوە جەختیکردووەتەوە، نوسراوی رێگریکردن لە بە قەزابوونی گوڵاڵە  لە رێگەی پارێزگارەوە نێردراوە بۆ وەزارەتی پلاندانانی عێراق، بۆئەوەی بەقەزاکردنەکە رابگرێت، ئەندامانی فراکسیۆنی بەدر و یەکێتی لەوانەن کە واژۆیان کردووە و دژی بڕیارەکە وەستاونەتەوە.

گوڵاڵە ناحیەیەکی سەر بە قەزای خانەقین بوو، یەکێکە لەو ناوچانەی مادەی 140ی دەستوور دەیگرێتەوە و کێشەلەسەرە؛ چارەنووسی کارگێڕی لەنێوان هەرێمی کوردستان و حکومەتی فیدراڵی یەکلایی نەبووەتەوە.