ژووری بازرگانیی سلێمانی: کۆگاکان پڕن و هیچ مەترسییەک لەسەر نەمانی خۆراک نییە
بینای ژووری بازرگانی
SNN
ژووری بازرگانیی سلێمانی بەر لە هاتنی مانگی ڕەمەزان دڵنیایی دەداتە هاونیشتمانییان کە خۆراک و کاڵای پێویست بەردەستە و ڕێڕەوە بازرگانییەکان کراوەن.
ئامادەکارییەکان بۆ مانگی ڕەمەزان
ژووری بازرگانی و پیشەسازیی سلێمانی ڕایدەگەیەنێت، بازرگانانی شارەکە بە مەبەستی پێشوازیکردن لە مانگی ڕەمەزان، بڕێکی زۆر لە کاڵا و خۆراکیان هاوردە کردووە. لە ئێستادا کۆگا و مارکێتەکان پڕن لە پێداویستییە سەرەکییەکان و دابینکردنی خۆراک بە شێوەیەکی ئاسایی بەردەوامە.
فرەچەشنکردنی سەرچاوەی هاوردەکردن
سەبارەت بە ڕێگاکانی گەیشتنی کاڵا، ژووری بازرگانی ڕوونیکردەوە کە پرۆسەی هاوردەکردن تەنیا پشتی بە دەروازە سنوورییەکانی ئێران نەبەستووە. بەڵکو لەڕێگەی بەندەری ئومقەسر و دەروازەی ئیبراهیم خەلیل (تورکیا)ـەوە بەردەوام کاڵا دەگاتە شارەکە، کە ئەمەش گەرەنتی بەردەوامی دابینکردنی خۆراک دەکات.
سلێمانی وەک سەبەتەی خۆراکی عێراق
ژوورەکە جەختی کردەوە کە سلێمانی وەک هەمیشە ڕۆڵی خۆی دەبینێت وەک ناوەندێکی سەرەکی بۆ دابەشکردنی خۆراک بەسەر پارێزگاکانی دیکەی عێراقدا و هیچ مەترسییەک بۆ کەمبوونەوەی خۆراک لە ئارادا نییە.
