SNN-
سەرۆکی یەکێتی لە بەغداوە پەیامێک لەبارەی دۆخی ئاڵۆزی ناوچەکە دەدات و ڕایدەگەیەنێت، لەگەڵ سەرۆکی ئەنجوومەنی باڵای ئیسلامی هاوڕان لەسەر ئەوەی نابێت عێراق ببێتە بەشێک لە شەڕی ناوچەکە.
تاوتوێکردنی مەترسییەکان
بافڵ جەلال تاڵەبانی، سەرۆکی یەکێتیی نیشتمانیی کوردستان لە شاری بەغداد لەگەڵ د. هومام حەموودی، سەرۆکی ئەنجوومەنی باڵای ئیسلامی عێراق کۆبووەوە. لە دیدارەکەدا بە وردی باسیان لە دوایین پەرەسەندنە مەترسیدارەکانی ناوچەکە کرد و هەردوولا نیگەرانیی خۆیان لە ئەگەری فراوانبوونی شەڕ و ڕووبەڕووبوونەوەکان نیشاندا.
پاراستنی عێراق لە شەڕ
لە بەشێکی دیکەی کۆبوونەوەکدا، هەردوولا جەختیان لەوە کردەوە کە بە هەموو شێوەیەک “هەر هەوڵێک بۆ ڕاکێشانی عێراق بۆ نێو ململانێکان ڕەتدەکەنەوە”. هاوکات لەسەر ئەوە رێککەوتن کە دەبێت ڕێگەی دیپلۆماسی و گفتوگۆ بگیرێتەبەر بۆ ئەوەی سەقامگیریی وڵات پارێزراو بێت و عێراق نەبێتە مەیدانی یەکلاکردنەوەی کێشەکان.
