حکومەتی هەرێمی کوردستان: بەشێک نین لە هیچ پیلانێک دژی ئێران و تەنیا داوای ئاشتی دەکەین

SNN

وتەبێژی حکومەتی هەرێمی کوردستان وەڵامی ئەو دەنگۆیانە دەداتەوە کە باس لە تێوەگلانی هەرێم دەکەن لە پڕچەککردنی هێزە ئۆپۆزسیۆنەکانی ئێران و ڕایدەگەیەنێت، ئەو هەواڵانە بە مەبەست بڵاوکراونەتەوە و ئێمە بەتووندی ڕەتیان دەکەینەوە.

ڕەتکردنەوەی پڕچەککردنی ئۆپۆزسیۆن
پێشەوا هەورامانی، وتەبێژی حکومەتی هەرێمی کوردستان لەبارەی ئەو ڕاپۆرتانەی باس لە ڕۆڵی هەرێم دەکەن لە دژایەتیکردنی ئێران ڕوونکردنەوە دەدات. هەورامانی دەڵێت: “ئەو قسانەی گوایە ئێمە بەشێکین لە پیلانێک بۆ پڕچەککردن و ناردنی پارتە کوردییە ئۆپۆزسیۆنەکان بۆ ناوخاکی ئێران، بەتەواوی ناڕاستن و ڕەتیان دەکەینەوە، ئەو دەنگۆیانە بە مەبەست بڵاو دەکرێنەوە.”

هەرێمی کوردستان بەشێک نییە لە ئاڵۆزییەکان
وتەبێژەکەی حکومەت جەخت لەوە دەکاتەوە کە سیاسەتی هەرێمی کوردستان دوورە لە هەڵگیرسانی شەڕ. بە وتەی ئەو، نە حکومەتی هەرێم و نە پارتە سیاسییەکانی هەرێمی کوردستان، بەشێک نین لە هیچ هەڵمەتێک کە ئامانج لێی فراوانکردنی شەڕ و زیادکردنی ئاڵۆزییەکان بێت لە ناوچەکەدا.

داواکاری بۆ پاراستنی هەرێمی کوردستان
لە کۆتایی پەیامەکەیدا، پێشەوا هەورامانی داوای دەستبەجێ ڕاگرتنی هێرشەکان دەکات و دەڵێت: “ئێمە داوای ئاشتی و سەقامگیری دەکەین و هێرشە ترسنۆکانەکانی سەر هەرێم شەرمەزار دەکەین.”
هەروەها داوا لە حکومەتی فیدراڵی عێراق و کۆمەڵگەی نێودەوڵەتی دەکات کە سنوورێک بۆ ئەو پەلامارانە دابنێن و کار بۆ پاراستنی خاک و خەڵکی هەرێمی کوردستان بکەن.