لەATMـەكانی هەڵەبجە نەپارە هەیە نەكارمەند نە كارەبا، فەرمانبەران مووچەكانیان وەرنەگرت

عەلی حەمە سەعید-SNN

لەگەڵ ئەوەی وابڕیاربوو ئەمڕۆ دەستبكرێت بەدابەشكردنی مووچەی مانگی شوباتی مامۆستایان و فەرمانبەران، بەڵام ئەو مامۆستاو فەرمانبەرانەی كە مووچەكانیان گوازراوەتەوە بۆ سەر پرۆژەی هەژماری من لە سنوری پارێزگای هەڵەبجە نەیانتوانی مووچەكانیان وەربگرن، ئەوەش بەهۆی ئەوەی پارە لە ATMەكان نییە.

ئاسۆ عەلی، یەكێك لە مامۆستایانی هەڵەبجە بە SNNی راگەیاند: لەگەڵ ئەوەی وابڕیار بوو ئەمڕۆ مووچەی مانگی دوو وەربگرین، بەلام تا نیوەڕۆی ئەمڕۆ نە پارەی مووچەكانمان خراوەتە سەر حسابەكانمان نە ATMەكانیش پارەیان تێكراوە بۆ دابەشكردنی مووچە.

ئاماژەی بەوەشكرد، ئەمڕۆ چەند جارێك چووینەتە بەردەم ئامێرەكانی ڕاكێشانی پارە لەهەڵەبجە بەلام كارمەندانی پرۆژەی هەژماری من لە بەردەم ATMەكان نین و هاوكات ئەو ئامێرانە كارەباشیان بۆ دابیننەكراوە.

ئەو مامۆستایەی هەڵەبجە ئەوەشی خستەڕوو، ئێمە چەند مامۆستایەك پەیوەندیمان بە یەكێك لە بانكە بەشداربووەكانی پرۆژەی هەژماری منەوە كرد، ئەوەیان پێراگەیاندین كە بەهۆی ئەم بارودۆخەوە هاتووەتە ئاراوە تا ئێستا نەمانتوانیوە ATMەكانی هەڵەبجە كارابكەین و پارەیان بۆ دابین بكەین، بۆیە هەوڵدەدرێت لەماوەی دوو ڕۆژی داهاتوودا ئەو گرفتە چارەسەر بكەن.