SNN-
جێگری سەرۆکوەزیرانی هەرێمی کوردستان لە میانی بەسەرکردنەوەی دەزگای چاپ و بڵاوکردنەوەی سەردەم، جەختی لە گرنگیی کلتوور و فیکر بۆ شار کردەوە و بەڵێنی پشتگیریکردنی ناوەندە رۆشنبیرییەکانی دا.
پەیوەندیی کلتوور و جەستەی شار
قوباد تاڵەبانی ئاماژەی بەوە کرد، شار تەنیا لە شەقام، بازاڕ و باڵەخانەکان پێکنایەت. ئەگەر ئەوانە جەستەی شار بن، ئەوا کلتوور، ئەدەب و چالاکییە هزری و رۆشنبیرییەکان روحی شار پێکدەهێنن. ناوبراو باسی لەوەش کرد، لەکاتێکدا باڵەخانەکان کۆن دەبن و لەکەڵک دەکەون، بەڵام کلتوور و بیرۆکە درەوشاوەکان شێوازی ژیان و رەفتاری نەوەکان لە داهاتوودا دیاری دەکەن.
بەسەرکردنەوەی دەزگای سەردەم و نووسەران
جێگری سەرۆکوەزیران خۆشحاڵیی خۆی بۆ بەسەرکردنەوەی دەزگای چاپ و بڵاوکردنەوەی سەردەم و دیداری لەگەڵ نووسەر و رۆشنبیرانی سلێمانی دەربڕی. لە ناویشیاندا بە تایبەتی ئاماژەی بە مامۆستا رەئوف بێگەرد کرد، کە لە زیاتر لە 50 ساڵی ڕابردوودا خزمەتی گەورەی بە ئەدەب و رۆشنبیریی کوردستان کردووە.
پێشەنگکردنی سلێمانی لە ناوچەکەدا
قوباد تاڵەبانی ڕایگەیاند، ئەرکی ئەوانە پشتگیریی دەزگای سەردەم و ناوەندە هاوشێوەکانی بکەن کە خزمەت بە ئەدەب دەکەن. ئاشکراشی کرد، لەمەودا بە هاوکاری لەگەڵ ئەو ناوەندانە هەوڵی زیاتر دەدەن بۆ بووژانەوەی چالاکییە کلتووری و رۆشنبیرییەکان، بەو ئامانجەی سلێمانی وەک پایتەختی رۆشنبیری نەک تەنیا لەسەر ئاستی کوردستان، بەڵکو لەسەر ئاستی ناوچەکەش ببێتە پێشەنگ.
