وەزیری دەرەوەی ئێران: هیچ دەستپێشخەرییەک بۆ کۆتایهێنان بە جەنگ نەکراوە

SNN

عەباس عراقچی، وەزیری دەرەوەی ئێران، لە چاوپێکەوتنێکدا لەگەڵ رۆژنامەی “العربی الجدید رایگەیاندووە  :ئامادەین بۆ پێکهێنانی لیژنەیەکی لێکۆڵینەوەی هاوبەش لەگەڵ وڵاتانی ناوچەکە سەبارەت بەو ئامانجانەی کە لێیان دراوە، تەندروستی رێبەری باڵا باشە و ئەرکەکان رادەسپێرێت.

ئاماژەی بەوەکردووە،هێرشەکانمان تەنها بنکە و بەرژەوەندییەکانی ئەمریکا لە ناوچەکە دەکەنە ئامانج، ئەمریکییەکان فرۆکەیەکی بێفڕۆکەوانی هاوشێوەی فڕۆکەی بێفڕۆکەوانی شاهیدی ئێمەیان دروستکردووە، کە ناوی “لوکاس”ە، بەتەواوی هاوشێوەیەتی، هەروەها بۆ بەئامانجگرتنی پێگەكانی وڵاتانی عەرەبی بەکاردەهێنرێت.

وتوویەتی “تا ئێستا هیچ ناوچەیەکی مەدەنی و نیشتەجێبوونمان لە وڵاتانی ناوچەکە نەکردۆتە ئامانج، پەیوەندییەکانمان لەگەڵ قەتەر، سعوودیە، عومان و وڵاتانی دراوسێ بەردەوامە.”

عێراقچی هەڕەشە دەکات و دەڵێت: “ئەگەر دامەزراوە وزەی ئێمە بکرێنە ئامانج، کۆمپانیا ئەمریکییەکان لە ناوچەکەدا دەکەینە ئامانج، داگیرکردنی دوورگەی خارگ هەڵەیەکی گەورەتر دەبێت لە هێرشکردنە سەری.”

سەبارەت بە کۆتایهاتنی جەنگ روونیکردووەتەوە، تاوەکو ئێستا هیچ دەسپێشخەرییەکی دیاریکراو بۆ کۆتاییهێنان بە جەنگ لە ئارادا نییە، پێشوازی لە هەر دەسپێشخەرییەکی ناوچەیی دەکەین کە ببێتە هۆی کۆتاییهێنانێکی دادپەروەرانە بە جەنگ، کۆتاییهێنان بە شەڕ پەیوەستە بە گەرەنتی دووبارە نەبوونەوەی و پێدانی قەرەبوو.

لەبارەی گەرووی هورمزەوە وتوویەتی “گەرووی هورمز بە ڕووی هەموواندا کراوەیە، تەنها بۆ ئەمریکا و هاوپەیمانەکانی نەبێت، بارودۆخی ئێرانیش جێگیرە و هیچ جۆرە جیابوونەوە و درزێک لە دامەزراوەکانی دەوڵەت یان سوپادا نییە.”

سەبارەت بە ڕێبەری کۆماری ئیسلامیش وتی: موجتەبا خامنەیی لە تەندروستییەکی باشدایە و بە تەواوی سەرپەرشتی و بەڕێوەبردنی دۆخەکە دەکات.