SNN-
بافڵ جەلال تاڵەبانی، سەرۆکی یەکێتیی نیشتمانیی کوردستان لە پەیامێکدا بەبۆنەی جەژنی نەورۆز و ساڵی نوێی کوردی، داوای یەکڕیزیی نێوان لایەنە سیاسییەکان دەکات و ڕایدەگەیێنێت، دەبێت هەمووان پێکەوە کاربکەین بۆ پاراستنی گەلەکەمان لەو مەترسییانەی ناوچەکەی گرتووەتەوە.
نەورۆز و ڕاپەڕینی کەرکوک
بافڵ جەلال تاڵەبانی لە پەیامەکەیدا پیرۆزبایی جەژنی نەورۆز و سەری ساڵی نوێی کوردی لە کوردستانیان دەکات و ئاماژە بەوە دەدات کە ئەم جەژنە هاوکاتە لەگەڵ ساڵیادی ڕاپەڕینی “کەرکوکی قودسی کوردستان”، کە بۆنەیەکی نەتەوەیی گرنگە لای گەلی کورد.
نەورۆز؛ هێمای پێکەوەبوون
سەرۆکی یەکێتی جەخت لەوە دەکاتەوە کە نەورۆز بۆ کورد تەنیا جەژنێک نییە، بەڵکو “هێمای ئاشتی، برایەتی و یەکگرتوویی گەلەکەمانە”. دەشڵێت، ئەم یادە هانمان دەدات بە هەمان ڕۆحیەتی پێکەوەیی کاربکەین بۆ پاراستنی سەقامگیریی وڵات و خزمەتکردنی خەڵکە خۆشەویستەکەمان.
بانگەواز بۆ یەکڕیزیی سیاسی
لە بەشێکی تری پەیامەکەیدا، بافڵ جەلال تاڵەبانی پابەندبوونی خۆی بە یەکێتیی نەتەوەیی و تەبایی نێوان لایەنە سیاسییەکان دووپات دەکاتەوە. داواش دەکات لەم کاتە هەستیارەدا کە ناوچەکە بە دۆخێکی پڕ مەترسیدا تێدەپەڕێت، لایەنەکان یەکدەنگ بن بۆ ئەوەی بتوانن میللەتەکەمان لە هەر هەڕەشەیەک بپارێزن.
