دوای قسەکانی ترەمپ بۆ راگرتنی جەنگ ئێران و ڕوسیا پرسی ڕاگرتنی شەڕیان تاوتوێ کرد

SNN-

دوای ڕاگەیاندنی دەستپێکردنی گفتوگۆکانی نێوان واشنتن و تاران، وەزیرانی دەرەوەی ڕوسیا و ئێران پەیوەندییەکی تەلەفۆنییان ئەنجامدا و پرسی ڕاگرتنی شەڕیان تاوتوێ کرد.

پەیوەندیی تەلەفۆنیی نێوان تاران و مۆسکۆ

وەزارەتی دەرەوەی ڕووسیا ڕایگەیاند، ڕۆژی دووشەممە 23ـی ئازاری 2026، عەباس عێراقچی، وەزیری دەرەوەی ئێران پەیوەندییەکی تەلەفۆنیی لەگەڵ سێرگی لاڤرۆڤی هاوتا ڕوسییەکەی ئەنجامداوە. ئەم پەیوەندییە کە لەسەر داوای تاران بووە، دوای ئەوە هات کە دۆناڵد ترەمپ، سەرۆکی ئەمریکا ئاشکرای کرد واشنتن و تاران گفتوگۆی “زۆر باش و بەرهەمدار”یان بۆ گەیشتن بە چارەسەرێکی گشتگیر ئەنجامداوە.

داواکاریی ڕوسیا بۆ چارەسەری سیاسی

لە ڕاگەیەندراوەکەی وەزارەتی دەرەوەی ڕوسیادا هاتووە، سێرگی لاڤرۆڤ داوای ڕاگرتنی دەستبەجێی کردەوە دوژمنکارییەکانی کردووە. لاڤرۆڤ جەختی لەوە کردووەتەوە کە پێویستە هەر چارەسەرێکی سیاسی کە دێتە ئاراوە، بەرژەوەندییە شەرعییەکانی هەموو لایەنە بەشداربووەکان، بەتایبەتی بەرژەوەندییەکانی کۆماری ئیسلامیی ئێران، بەتەواوی لەبەرچاو بگرێت.