بۆچی ترەمپ بڕیاری راگرتنی هێرشەکانی بۆ سەر ئێران دا؟

SNN-

ئاژانسی بلوومبێرگ نهێنیی پاشەکشەکەی دۆناڵد ترەمپ لە هێرشکردنە سەر ئێران ئاشکرا دەکات. بەپێی راپۆرتەکە، سەرۆکی ئەمریکا لەژێر فشاری هاوپەیمانەکانی و ترس لە داڕمانی بازاڕی وزە، بڕیاری داوە بۆردوومانەکان رابگرێت و دەرفەت بە دیپلۆماسی بدات.

هۆشداریی لە “خاڵی بێ گەڕانەوە”
بەپێی راپۆرتێکی ئاژانسی بلوومبێرگ کە ئەمڕۆ دووشەممە بڵاوکراوەتەوە، راوێژکارە باڵاکانی کۆشکی سپی هۆشداریی توندیان داوەتە دۆناڵد ترەمپ. ئەوان پێیان ڕاگەیاندووە کە هەر جۆرە هێرشێک بۆ سەر ژێرخانی وزە و وێستگەکانی کارەبای ئێران، شەڕەکە دەباتە قۆناغێکی مەترسیدار کە چیتر کۆنتڕۆڵ ناکرێت و سەقامگیریی تەواوی ڕۆژهەڵاتی ناوەڕاست تێکدەدات.

ترسی داڕمانی بازاڕە جیهانییەکان
تەنیا هۆشداریی سیاسی نەبووەتە هۆی وەستاندنی هێرشەکان، بەڵکو کاردانەوەی بازاڕە داراییەکان و ترسی پەککەوتنی بازاڕی وزە، هۆکارێکی سەرەکی بوون. ترەمپ لەوە ترساوە کە بەرزبوونەوەی نرخی سووتەمنی و تێکچوونی ئابووری جیهانی، لێکەوتەی پێچەوانەی لەسەر ئەمریکاش هەبێت، بۆیە ناچار بووە پەنا بۆ ئەم “پشووە سەربازییە” ببات.

دەرفەتێک بۆ تاران و دیپلۆماسی
لە ئێستادا ترەمپ بڕیاریداوە هێرشە ئاسمانییەکان بە شێوەیەکی کاتی ڕابگرێت. ئامانجی ئەم هەنگاوەش ئەوەیە کە بزانێت ئایا تاران لەژێر ئەم فشارانەدا ئامادەیە بێتە سەر مێزی گفتوگۆ و ڕێککەوتنێکی نوێ بکات، یان ئاڵۆزییەکان بەردەوام دەبن. راوێژکارەکان جەختیان کردووەتەوە کە پەکخستنی کەرتی وزەی ئێران “خاڵی بێ گەڕانەوەیە”، بۆیە واشنتن دەیەوێت دواین چانسی دیپلۆماسی تاقی بکاتەوە.