ترەمپ پەردە لەسەر ڕێککەوتنێک لادەبات: ئێران ڕازی بوو دەستبەرداری چەکی ئەتۆمی بێت

SNN-

دۆناڵد ترەمپ، سەرۆکی ئەمریکا، گۆڕانکارییەکی گەورە لە جەنگی دژی ئێران ڕادەگەیەنێت. ترەمپ ئاشکرای دەکات کە فەرمانی بە وەزارەتی بەرگری کردووە هێرشەکان ڕابگرن و دەڵێت: “ئێرانییەکان ئێستا ئاشتییان دەوێت”.

بۆردوومانەکان ڕاگیران
دۆناڵد ترەمپ لە زنجیرەیەک لێدوانی نوێدا ڕایگەیاند، کە فەرمانی بە وەزارەتی جەنگ (پنتاگۆن) کردووە هێرشە ئاسمانییەکانی بۆ سەر دامەزراوەکانی ئێران بە شێوەیەکی کاتی ڕابگرێت. ترەمپ دەڵێت: “شتی ئەرێنیمان لە ئارادایە و لە ئێستادا گفتوگۆی زۆر باشمان لەگەڵ ئێران هەیە”.

“تاران لە هەڵوێستەکەیدا جددییە”
سەرۆکی ئەمریکا ئاماژەی بەوە کرد کە دوای ئەوەی هێزی دەریایی ئێران و بەشێکی زۆری سەرکردایەتیی وڵاتەکەیان تێکشکاندووە، ئێستا تاران بۆ یەکەمجار لە هەڵوێستەکەیدا جددییە. ترەمپ وتی: “لە سەرکردەکانی ئێران ڕزگارمان بوو و تواناکانیانمان هەڵوەشاندەوە، بۆیە چیتر ناتوانن هەڕەشەمان لێ بکەن و داوای ئاشتی دەکەن”.

مۆڵەتی پێنج ڕۆژ بۆ ڕێککەوتنی کۆتایی
بەپێی وتەکانی ترەمپ، ئێران ڕەزامەندیی دەربڕیوە لەسەر ئەوەی “هەرگیز” چەکی ئەتۆمی بەدەست نەهێنێت. ترەمپ هیوای خواست بگەنە ڕێککەوتنێکی گشتگیر و وتی: “هەلەکە زۆر باشە، بەڵام تاران تەنیا 5 ڕۆژی لەبەردەمدایە بۆ ئەوەی بڕیاری کۆتایی بدات”.