ترەمپ بە 15 خاڵک کۆتایی بە گرژییەکانی لەگەڵ ئێران دەهێنێت

SNN

ئاژانسەکانی هەواڵ ئاشکرایان کرد، ئیدارەی دۆناڵد تڕەمپ، سەرۆکی ئەمریکا، سەرقاڵی ئامادەکردنی بەڵگەنامەیەکی 15 خاڵییە بە مەبەستی کۆتاییهێنان بە گرژی و شەڕ لەگەڵ ئێران.

وردەکاریی مەرجەکانی ناو رێککەوتنە ١٥ خاڵییەکە:
مەرجەکانی ئەم پڕۆژەیە بەسەر سێ تەوەرەی سەرەکیدا دابەش بوون:

یەکەم: دۆسیەی ئەتۆمی و پشکنین:
– راگەیاندنی ئاگربەستی یەک مانگی بۆ رەخساندنی زەمینەی گفتوگۆ.
– لەناوبردنی تەواوی ئەو توانایە ئەتۆمییانەی تا ئێستا کۆکراونەتەوە.
– پابەندبوونی تاران بەوەی هەرگیز هەوڵ بۆ بەدەستهێنانی چەکی ئەتۆمی نەدات.
– قەدەغەکردنی پیتاندنی هەر جۆرە ماددەیەکی ئەتۆمی لە ناو خاکی ئێراندا.
– گواستنەوەی تەواوی ماددە پیتێنراوەکان بۆ ئاژانسی نێودەوڵەتی وزەی ئەتۆم.
– لەکارخستن و تێکدانی بنکە ئەتۆمییەکانی (نەتەنز، ئەسفەهان و فۆردۆ).
– رێگەدانی بێ مەرج بە ئاژانسی ئەتۆم بۆ دەستگەیشتن بە هەموو زانیاری و شوێنەکان.

دووەم: سەقامگیری ناوچەیی و توانای سەربازی:
– دەستبەرداربوونی ئێران لە پاڵپشتیکردنی گرووپە بریکارەکان و تاقمە چەکدارەکان.
– راگرتنی کردەیی هەموو جۆرە تەمویلکردن و پڕچەککردنی گروپە لایەنگرەکانی تاران.
– کراوە هێشتنەوەی گەرووی هورمز وەک ناوچەیەکی دەریایی ئازاد.
– سنووردارکردنی ژمارە و مەودای پڕۆژە موشەکییەکانی ئێران لە داهاتوودا.
– بەکارهێنانی توانای سەربازی ئێران تەنها بۆ مەبەستی بەرگری لە خاک.

سێیەم: ئابووری و گەرەنتییە ئاشتییانییەکان:
– هەڵگرتنی تەواوی ئەو سزایانەی کە لە ساڵانی ڕابردوودا خراونەتە سەر ئێران.
– پابەندبوونی ئەمریکا و ئیسرائیل بەوەی جارێکی دیکە هێرش نەکەنەوە سەر خاکی ئێران.
– پێشکەشکردنی هاوکاری بۆ پەرەپێدانی پڕۆژەی ئەتۆمی مەدەنی لە بوشەهر تەنها بۆ بەرهەمهێنانی کارەبا.