نێچیرڤان بارزانی: ئێران دانی بەوەدا ناوە هەڵە بووە

SNN –

نێچیرڤان بارزانی، سەرۆکی هەرێمی کوردستان دەربارەی بۆردومانەکەی ئێران بۆ سەر پێشمەرگە ڕایگەیاند، ئێمە نەبووینەتە بەشێک لەم جەنگە و ناشبین، هیوادارین کۆماری ئیسلامی ئێران لێکۆڵینەوەی تەواو لەو بابەتە بکات و هەرێمی کوردستانیش ئاگادار بکاتەوە لەوەی چی ڕوویداوە

سەرۆکی هەرێمی کوردستان لە لێدوانێکدا ئاماژەی بەوەکرد، لایەنی ئێرانی بەڵێنیان داوە لێکۆڵینەوەی ورد لە بابەتەکە بکەن و پەیامی سەرەخۆشییان بۆ هەرێمی کوردستان ناردووە. وتیشی: “ئێمە چاوەڕوانی ئەوەین بزانین وەڵامی کۆتایی کۆماری ئیسلامی ئێران بۆ هەرێمی کوردستان چی دەبێت.”

نێچیرڤان بارزانی جەختی لە هەڵوێستی نەگۆڕی هەرێم کردەوە و ڕایگەیاند: “ئێمە بە هیچ شێوەیەک بەشێک نین و نابین لەم جەنگە، بە توندیش سەرکۆنەی ئەم هێرشانە دەکەین.”

سەبارەت بە پێگەی هەرێم لە ناوچەکەدا، سەرۆکی هەرێم ئاماژەی بەوە کرد کە هەرێمی کوردستان هەمیشە فاکتەری ئارامی و سەقامگیری بووە و سەرچاوەی هەڕەشە نییە بۆ هیچ وڵاتێکی دراوسێ، بە تایبەتیش کۆماری ئیسلامی ئێران.

لە کۆتایی لێدوانەکەیدا، داوای کرد کە دەبێت تاران لێکۆڵینەوەی تەواو لە ڕووداوەکە بکات و لایەنی هەرێمی کوردستانیش ئاگاداربکاتەوە لەوەی کە چی روویداوە.