لە دوو ڕۆژدا 7 کەشتی بە گەرووی هورمز دا تێپەڕیون

SNN-

سەرەڕای بەردەوامیی جەنگی ئێران، لە ماوەی دوو ڕۆژی ڕابردوودا، حەوت کەشتی بە گەرووی هوورمزدا تێپەڕیون.

25 و 26ـى ئازار

بەگوێرەی چاودێرییەکانی پێگەی مارین ترافیک، کە تایبەتە بە جوڵەی کەشتییە دەریاییەکان، لە ماوەی ڕۆژانی 25 و 26ـی ئەم مانگەدا، حەوت کەشتی بە گەرووى هوورمزدا تێپەڕیون.

25ـی مانگ، دوو لە کەشتییەکان کە ناویان ئەگرەت و ساڤۆنا بووە و تایبەتن بە گواستنەوەی ماددەی کیمیایی و نەوت، بەبێ بار و ڕۆژێک دواتریش دوو کەشتی بە بارەوە تێپەڕیون.

هەر لە 26ـی مانگ، سێ کەشتی تایبەت بە گواستنەوەی غاز و نەوت بە گەرووەکەدا تێپەڕیون.

پاسداران 3 کەشتى گەڕاندەوە

سوپای پاسداران، لە نوێترین ڕاگەیێندراویدا دەڵێت، سێ کەشتییان گەڕاندووەتەوە کە ویستویانە گەرووەکە تێپەڕێنن و جەختیش لەوە دەکاتەوە، ڕێگە بە هیچ کەشتییەکی “دوژمن” نادەن بە هوورمزدا تێبپەڕێت.

ڕۆژنە 138 کەشتى بە گەرووەکەدا تێدەپەڕن

ئەوەش لە کاتێکدایە، جەنگی ئێران لەگەڵ ئەمریکا و ئیسرائیل کە بەرەو هەفتەی پێنجەم هەنگاو دەنێت، گەرووی هوورمز بەڕووی کەشتییە بازرگانییەکان دا داخراوە، ئەوەش قەیرانی وزەی بە دوای خۆیدا هێناوە و پێش جەنگەکە و لە ڕۆژانی ئاسایی دا، ڕۆژانە تێکڕا 138 کەشتی بە گەرووی هوورمزدا تێدەپەڕین.