هەولێر.. سبەی 30 هەزار بتڵ غازی ماڵان بە سیستەمی ئەلیکترۆنی دابەش دەکرێت
بتڵى غازى ماڵان | فۆتۆ: SNN
SNN – هەولێر
بەڕێوەبەرایەتی نەوت و کانزاکانی هەولێر بڕیاریدا بە دابەشکردنی بڕێکی زۆر لە غازی ماڵان و ڕایدەگەیەنێت، پڕۆسەکە بە تەواوی لە ڕێگەی کارتی ئەلیکترۆنییەوە دەبێت.
وردەکاری دابەشکردنەکە
سالار محەمەد، لێپرسراوی پشکنین و بەدواداچوون لە بەڕێوەبەرایەتی نەوت و کانزاکانی هەولێر، لە ئاگادارییەکی فەرمیدا کە ئاراستەی هاووڵاتیانی سنووری پارێزگاکە و قەزا و ناحیەکانی کردووە، ڕایگەیاند: “سبەینێ شەممە، پڕۆسەی دابەشکردنی غازی ماڵان دەستپێدەکات.”
بڕی غازی دابینکراو
بەپێی زانیارییەکانی بەڕێوەبەرایەتییەکە، بڕی 30 هەزار بتڵ غاز بۆ ئەم پڕۆسەیە تەرخانکراوە و تەنها لە ڕێگەی کارتی ئەلیکترۆنییەوە دەبێت و سەرجەم ناوچە جیاجیاکانی سنووری پارێزگای هەولێر دەگرێتەوە.
لێپرسراوی پشکنین و بەدواداچوون جەختیشی کردەوە کە بەم هەنگاوە هاووڵاتیان دەتوانن بە ئاسانی و لە شوێنە جیاجیاکان بڕی پێویستی غازی ماڵان بەدەست بهێنن.
