خاوەن کافتریاکانی پێنجوێن بڕیاریاندا لەسبەینێوە کافتریاکانیان دابخەن

SNN-عەلی حەمەسەعید

قایمقامی قەزای پێنجوێن ئاشکرایکرد بەەبەستی زیاتر کۆنترۆڵکردنی بڵاوبوونەوەی ڤایرۆسی کۆرۆنا لەقەزاکەماندا، پاش کۆبوونەوەمان لەگەڵ خاوەن کافتریاکان، بڕیاریاندا کە لەسبەیەوە بۆماوەی هەفتەیەک سەرجەم کافتریاکانی قەزای پێنجوێن دابخرێن.

زانا رەحمان، قایمامی قەزای پێنجوێن بە SNNی راگەیاند: وەک هەستکردن بە بەرپرسارێتی و بەمەبەستی زیاتر کۆنترۆڵکردنی بارودۆخی تەندروستی و رێگریکردن لە زیاتر بڵاوبوونەوەی کۆرۆنا لە سنورەکەدا ئەمڕۆ بەئامادەبوونی بەڕێوەبەری نەخۆشخانەی گشتی شەهیدانی پێنجوێن و ئەندامانی لیژنەهاوبەشەکانی قایمقامیەتی قەزای پێنجوێن، لەگەڵ سەرجەم خاوەن کافتریاکانی پێنجوێن کۆبووینەوە.

ئاماژەی بەوەشکرد، لەکۆبوونەوەکەدا سەرجەم خاوەن کافتریاکان بڕیاریاندا لەپێناو پاراستنی سەلامەتی و بەشداربوونیان لە رێگری زیاتری بڵاوبوونەوەی ڤایرۆسی کۆرۆنا، لەسبەیەوە بۆ ماوەی هەفتەیەک سەرجەم کافتریاکانیان دابخەن.

قایمقامی قەزای پێنجوێن ئەوەشی وت “بڕیاری خاوەن کافتریاکان بەداخستنی دوکانەکانیان سەرەڕای خراپی باری داراییان، سەلمێنەری ئەوەیە کە هاووڵاتیان گەیشتونەتە ئەو بڕوایەی کە دەبێت چیدیکە خۆمان لەخەمی تەندروستی خۆماندا بین و پابەندی ڕێکارە تەندروستییەکان ببین”.