دیلان غەفور: بەشداری لە دانیشتنی پەرلەمان دەكەین بۆ هەڵبژاردنی سەرۆككۆمار

عەلی حەمە سەعید-SNN

وتەبێژی فراكسیۆنی یەكێتی لە  پەرلەمانی عێراق ئاماژە بەوەدەكات، هەوڵەكان چڕكراونەتەوە بۆ ئەوەی دانیشتنێكی تایبەت بە هەڵبژاردنی سەرۆك كۆمار بەڕێوەبچێت، بۆ ئەو مەبەستەش نزیكەی 230 واژۆی پەرلەمانتاران ئاراستەی دەستەی سەرۆكایەتی پەرلەمان كراوە و ئێمەش ئامادەی دانیشتنكەكە دەبین.

دیلان غەفور، وتەبێژی فراكسیۆنی یەكێتی  لە پەرلەمانی عێراق بە SNNی ڕاگەیاند: لە چوارچێوەی هەوڵەكان بۆ تێپەڕاندنی ئەم دۆخە چەقبەسووە سیاسییەی لە عێراق هەیە، لە ئێستادا هەولِێك هەیە بۆ ئەوەی بابەتی هەڵبژاردنی پۆستی سەرۆك كۆمار لە پەرلەمان یەكلایی بكرێتەوە، بۆیە ئێمەش وەك پەرلەمانتارانی یەكێتی بەشداری لە دانیشتنی ئەنجومەنی نوێنەران بۆ هەڵبژاردنی سەرۆككۆمار دەكەین چونكە دۆخی ناوچەكە پێویستی بە یەكلایی كردنەوەی پۆستەكان هەیە.

ئاماژەی بەوەشكرد، هەر لەو چورچێوەیەشدا تا ئێستا نزیكەی 230 واژۆی پەرلەمانتارارن كۆكراوەتەوە بۆ دانیشتنی ئەنجومەنی نوێنەران بۆ هەڵبژاردنی سەرۆككۆمار، ئەوژمارەیەش رێژەی یاسایی تێپەڕاندووە بەڵام هێشتا بەفەرمی وادەی دانیشتنەكە دیاری نەكراوە لەلایەن دەستەی سەرۆكایەتی پەرلەمانەوە.

وتەبێژەكەی فراكسیۆنی یەكێتیی ئەوەشی خستەڕوو، دۆخی سیاسی ناوچەكە و بەردەوامی شەڕ و هێرشەكان بۆسەر عێراق و هەرێمی كوردستان، پێویستی بە پێكهێنانی حكومەتێكی بەهێز هەیە، بۆئەوەی رووبەڕووی لێكەوتە سیاسی و ئابوری و ئەمنییەكان ببێتەوە، بۆ ئەمەش پێویستە رێككارە یاساییەكان بۆ پێكهێنانی حكومەت تەواو بكەین