خاتەمولئەنبیا: زانیارییەکانی ئەمریکا هەڵەن؛ بۆردومانەکان کارگە گرنگەکانیان نەپێکاوە

SNN-

تاران جەخت دەکاتەوە کە هێرشەکانی ئەمریکا و ئیسرائیل نەیانتوانیوە زیان بە توانای سەربازیی وڵاتەکە بگەیەنن و هۆشداریی دەدات کە لە داهاتوودا وەڵامدانەوەکانیان فراوانتر و وێرانکەرتر دەبن.

شکستی ئەمریکا و ئیسرائیل لە پێکانی ئامانجە ستراتیژییەکان

وتەبێژی بارەگای ناوەندیی خاتەمولئەنبیا ڕایدەگەیەنێت، زانیارییەکانی ئەمریکا و ئیسرائیل لەبارەی توانای سەربازییان هەڵەیە. جەخت دەکاتەوە کە هێرشەکان نەیانتوانیوە کۆگا و کارگەکانی بەرهەمهێنانی مووشەک و درۆنە پێشکەوتووەکانیان لەناو ببەن. ناوچەکە بەهۆی هێرشەکانی ئەمریکا و ئیسرائیل بۆ سەر ئێران لەبەردەم پەرەسەندنێکی سەربازیی مەترسیداردایە، تارانیش بە مووشەکبارانکردنی بنکە سەربازییەکانی ئەمریکا لە وڵاتانی ناوچەکە و وڵاتانی کەنداو وەڵامی داوەتەوە.

بەرهەمهێنانی مووشەک و درۆن لە شوێنە نادیارەکان

بەگوێرەی ڕاگەیەندراوێکی فەرمیی وتەبێژی بارەگای خاتەمولئەنبیا، بەرهەمهێنانی مووشەکی بالیستی و درۆنی دوورهاوێژ لەو شوێنانەدا دەکرێت کە دوژمن هیچ زانیارییەکی لەبارەیانەوە نییە. ئاماژە بەوە کراوە ئەو شوێنانەی پێکراون زۆر بچووک و کەمبایەخ بوون و هیچ کاریگەرییەکیان لەسەر تواناکانیان نییە.

بەردەوامیی جەنگ تا خۆبەدەستەوەدانی دوژمن

وتەبێژەکە ڕایگەیاندووە کە پێویستە هێزەکانی ئەمریکا و ئیسرائیل هەوڵی ژماردنی ئامێرە جەنگییەکانیان نەدەن، چونکە هیچ ئەنجامێکی نابێت. جەخت کراوەتەوە کە جەنگ تا خۆبەدەستەوەدانی دوژمن بەردەوام دەبێت و دەبێت ئەوان باجی ئەو دەستدرێژییە بدەنەوە کە دەستیان پێکردووە.

هۆشداری لە گورزی وێرانکەر و پەشیمانیی هەمیشەیی

لە بەشێکی دیکەی ڕاگەیەندراوەکەدا هاتووە کە لە داهاتوودا وەڵامدانەوەکان بۆ سەر بنکەکانی دوژمن فراوانتر و وێرانکەرتر دەبن. گوتەبێژی بارەگای خاتەمولئەنبیا دەڵێت ئەمریکا و ئیسرائیل دەبێت چاوەڕێی گورزی زۆر بەهێزتر بن کە تا ئێستا لە بەرەکانی جەنگدا هاوشێوەیان نەبینیوە و ئەنجامی ئەم گورزانەش تووشی پەشیمانییەکی هەمیشەییان دەکات.