دۆناڵد ترەمپ: ئامانجە ستراتیژییەکانی ئێمە لە دژی ئێران بەرەو تەواوبوون دەچن

SNN – 

دۆناڵد ترەمپ، سەرۆکی ئەمریکا لە یەکەم وتاری تەلەفزیۆنیدا دوای دەستپێکردنی جەنگ، تێکشکانی تەواوەتی توانای سەربازیی کۆماری ئیسلامی ئێرانی ڕاگەیاند و جەختی کردەوە کە ئامانجە ستراتیژییەکانی واشنتن بەرەو تەواوبوون دەچن.

تێکشکاندنی توانای سەربازی و سەرکردایەتیی تاران

سەرۆکی ئەمریکا ئاشکرای کرد کە لە چوارچێوەی ئۆپەراسیۆنی “تووڕەیی داستانئاسا”، هێزی دەریایی ئێران بە تەواوی لەناوچووە و هێزی ئاسمانیی ئەو وڵاتەش بووەتە کەلاوە. ترەمپ ئاماژەی بەوە کرد کە سوپای پاسداران کاول کراوە و سەکۆکانی هەڵدانی مووشەک خاپوور کراون، هاوکات ڕایگەیاند کە زۆربەی ئەو سەرکردانەی ڕێبەرایەتیی ئەو “ڕژێمە تیرۆریستییەیان” دەکرد ئێستا مردوون و تاران هەموو توانایەکی بەرگری و هێرشبردنی لەدەستداوە.

وادەی کۆتاییهاتنی جەنگ و هەڕەشەی چاخی بەردین

ترەمپ هۆشدارییەکی توندی دا و ڕایگەیاند کە لە ماوەی 2 بۆ 3 هەفتەی داهاتوودا زۆر بە خراپی و بەهێزتر لە ئێران دەدەن و دەیانگەڕێننەوە بۆ “سەردەمی چاخی بەردین”، ئەوەش وەک هەنگاوێک بۆ ڕێگریکردن لە هەر هەڕەشەیەک. دووپاتیشی کردەوە کە پلان وایە لەو ماوەیەدا هەموو شتێک کۆتایی پێ بهێنرێت، چونکە واشنتن لەم جەنگەدا سەرکەوتنی بەدەستهێناوە.

سەربەخۆیی ئابوریی ئەمریکا و پاراستنی هاوپەیمانان

سەرۆکی ئەمریکا تیشکی خستە سەر ئەوەی کە وڵاتەکەی ئێستا بە تەواوی لە ڕۆژهەڵاتی ناوەڕاست سەربەخۆیە و پێویستی بە نەوتی ئەو ناوچەیە نییە. بەڵام لەگەڵ ئەوەشدا بەڵێنی دا کە واز لە وڵاتانی کەنداو و ئیسرائیل ناهێنێت. ترەمپ سوپاسی ئیسرائیل، سعودیە، قەتەر، ئیمارات، کوێت و بەحرەینی کرد و ڕایگەیاند کە ئەمریکا وەک پشتیوانێکی بەهێز لە تەنیشتیان دەمێنێتەوە.

بەرپرسیارێتیی گەرووی هورمز و ڕاستکردنەوەی هەڵەکانی ئۆباما

لە بەشێکی تری گوتارەکەیدا، ترەمپ داوای لەو وڵاتانە کرد کە نەوت لە گەرووی هورمزەوە وەردەگرن، خۆیان بەرپرسیارێتی پاراستنی ئەو ڕێڕەوە بگرنە ئەستۆ و “ئازایەتی” نیشان بدەن. هەروەها ئاماژەی بەوە کرد کە خەریکی ڕاستکردنەوەی هەڵە مێژووییەکانی سەرۆکەکانی پێشووە، بەتایبەت ڕێککەوتنە ناوەکییەکەی سەردەمی باراک ئۆباما، کە تێیدا ملیاران دۆلار بۆ ئێران گەڕێندرابووەوە.

هەڵوێست بەرامبەر دەسەڵاتی ئێران

سەرۆکی ئەمریکا ڕایگەیاند کە هەرچەندە نەیانویستووە ڕژێمی ئێران بڕووخێنن، بەڵام ئۆپەراسیۆنی “تووڕەیی داستانئاسا” بۆ پاراستنی جیهانی ئازاد پێویست بوو. ئاماژەی بەوەش کرد کە ئێستا بەهۆی گورزەکانی ئەمریکاوە دەسەڵاتی تاران بەرەو کۆتایی دەچێت و چیتر ئەو وڵاتە ناگاتە چەکی ناوەکی، ئەمەش دوای ئەوەی پێشتر ئەو ڕژێمە 45 هەزار خۆپیشاندەری خۆی کوشتووە و گەورەترین سپۆنسەری گرووپە چەکدارەکان بووە.