شەپۆلێکی بارانبارین و تەرزە هەرێمی کوردستان دەگرێتەوە و مەترسی لافاو هەیە

SNN –

شارەزایەکی کەشناسی، پێشبینییەکانی بۆ کەشوهەوای مانگی نیسان و سەرەتای مانگی ئایار بڵاوکردەوە و هۆشداری لە ڕوودانی لافاو دەدات.

پشتیوان پێنجوێنی، شارەزای کەشناسی پێشبینییەکانی بۆ کەشوهەوای مانگی نیسان بڵاوکردووەتەوە و دەڵێت: لە رۆژی 4-4 تاوەکو 10-4-2026، حاڵەتێکی ناسەقامگیری کەشوهەوا بەردەوام دەبێت. لە کاتەکانی نیوەڕۆ بۆ ئێوارە، ئاسمان دەگۆڕێت بۆ هەوری تەواو و لە ناوچە شاخاوییەکان و ناوچە جیاجیاکانی دیکە تاوە بارانی بەخوڕی کورتخایەن، هەورەگرمە، هەورەبروسکە و تەرزە دەبارێت.

دەشڵێت: لە رۆژی ١٠-١٥ی نیسان هەرێمی کوردستان دەکەوێتە ژێر کاریگەری شەپۆلێکی گەرماوە و لە رۆژی 20-ی نیسان بۆ 10-ی ئایارماوەیەکی باشی بارانبارین دەستپێدەکات، لە زۆربەی ناوچەکانی هەرێمی کوردستان بارانی باش و تەرزە دەبارێت، بەهۆی کاریگەری ئەم شەپۆلەشەوە لە هەندێک ناوچە مەترسی ڕوودانی لافاو هەیە.