وەزارەتی نەوتی عێراق: هەناردەکردنی نەوت لە ڕێگەی سووریاوە دەستیپێکرد

SNN – ئابووری

وەزارەتی نەوتی عێراق لە بەیاننامەیەکی فەرمیدا ڕایگەیاند، بە ئامانجی پاڵپشتیکردنی ئابووری نیشتمانی و زیادکردنی داهاتی دەوڵەت، پڕۆسەی هەناردەکردنی “نەوتی ڕەش”ی لە ڕێگەی تانکەرەوە بۆ وڵاتی سوریای دراوسێ دەستپێکردووە.

وەزارەتەکە ئاماژەی بە بوونی هەماهەنگی و هاوکارییەکی چڕ لەگەڵ لایەنی سوری کردووە، کە تێیدا سوریا گەرەنتی و زامنی گەیشتنی بارە نەوتەکان دەکات لە ناو خاکەکەیدا تاوەکو دەگاتە دەروازەکانی هەناردەکردن. هەر لە بەیاننامەکەدا هاتووە کە بڕی هەناردەکردنەکە وردە وردە زیاد دەکرێت بۆ ئەوەی ببێتە هێزێکی زیاتر بۆ خەزێنەی دەوڵەت.

ئەم هەنگاوەی وەزارەتی نەوت دوای ئەوە دێت کە پێشتریش عێراق هەناردەکردنی نەوتی خاوی لە ڕێگەی بەندەری جەیهانی تورکیاوە دەستپێکردبووەوە، ئەمەش نیشانەی هەوڵە چڕەکانی حکومەتی عێراقە بۆ دۆزینەوەی ڕێگەی جیاواز و نوێ بۆ ساغکردنەوەی بەرهەمە نەوتییەکانی لە بازاڕەکاندا.