دۆناڵد ترەمپ
SNN-
سەرۆکی ئەمریکا هەڕەشەی بەکارهێنانی فشارێکی تووند و گەمارۆی دەریایی گشتگیر دەکات لە ئەگەری رەتکردنەوەی پێشنیازەکانی واشنتن لەلایەن تارانەوە.
گەمارۆی دەریایی وەک ئامرازێکی یەکلاکەرەوە
دۆناڵد ترەمپ، سەرۆکی ئەمریکا لە رێگەی هەژماری تایبەتی خۆی لە سۆشیاڵ میدیای “تروس سۆشیاڵ” ئاماژەی بەوە کرد، گەمارۆی دەریایی ئەو “کارتە براوەیە” کە لە دەستی دایە بۆ مامەڵەکردن لەگەڵ ئێران ئەگەر نەیەتە ژێر باری مەرجەکانی ئەمریکا. ترەمپ ڤیدیۆیەکی بڵاوکردووەتەوە کە تێیدا باس لە کاریگەرییەکانی ئەم جۆرە گەمارۆیە دەکرێت وەک ئامرازێکی یەکلاکەرەوە.
کۆتاییهاتنی دانوستانەکانی ئیسلام ئاباد
ئەم لێدوانانەی ترەمپ دوای ئەوە دێن گەڕی کۆتایی دانوستانەکان لەگەڵ لایەنی ئێرانی لە ئیسلام ئاباد بەبێ گەیشتن بە هیچ رێککەوتنێک کۆتایی هات. لەم بارەیەوە، جی دی فانس، جێگری سەرۆکی ئەمریکا رایگەیاند، واشنتن لە هێڵە سوورەکانی خۆی پاشەکشە ناکات و ئێستا تۆپەکە لە گۆڕەپانی ئێراندایە.
دووبارەکردنەوەی ئەزموونی ڤەنزوێلا
ترەمپ پێشتریش ستراتیژییەکی هاوشێوەی دژی نیکۆلاس مادۆرۆی سەرۆکی ڤەنزوێلا بەکارهێناوە. لەو ئەزموونەدا لە رێگەی گەمارۆی دەریاییەوە ئابووریی ئەو وڵاتەی ئیفلیج کرد و داهاتی نەوتی لێ بڕین، ئێستاش هەمان ستراتیژ بۆ ئێران پێشنیاز دەکرێت.
بژاردەکان بۆ پەکخستنی ئابووریی ئێران
بەپێی شرۆڤەکان ئەگەر ئێران رێککەوتنی کۆتایی رەت بکاتەوە، ترەمپ رەنگە پەنا بۆ بژاردەی سەربازی و بۆردومانکردنی تاران ببات، یان ستراتیژی گەمارۆی دەریایی بەکاربهێنێت بۆ خنکاندنی ئابووریی ئێران و بڕینی هەناردەی نەوت بۆ وڵاتانی وەک چین و هیندستان، ئەمەش فشارێکی دیپلۆماسی گەورە لەسەر ئەو وڵاتانە دروست دەکات.
جووڵەی هێزە دەریاییەکانی ئەمریکا لە ناوچەکە
کەشتیی فڕۆکەهەڵگری زەبەلاحی “یو ئێس ئێس جێرالد فۆرد” (USS Gerald Ford) گەیشتە ئاوەکانی ناوچەی کەنداو و پەیوەندیی بە کەشتیی “یو ئێس ئێس ئەبراهام لینکۆڵن” و هێزە دەریاییەکانی دیکەی ئەمریکاوە کرد. شارەزایان پێیان وایە ئەم جووڵانە ئاماژەیەکن بۆ ئەوەی ترەمپ دەیەوێت بە گەمارۆیەکی دەریایی، کۆنترۆڵی ئێران بەسەر گەرووی هورمزدا تێکبشکێنێت و تاران ناچاری پاشەکشە بکات.
