نەوتی سپی
SNN-
بەڕێوەبەرایەتیی پسوڵەی خۆراکی سلێمانی ڕێکارێکی نوێ بۆ ئەو خێزانانە ڕادەگەیەنێت کە فۆڕمی خۆراکیان نییە، تاوەکو لە وەرگرتنی سوتەمەنی و پێداویستییە سەرەکییەکان بێبەش نەبن.
دابینکردنی سوتەمەنی بۆ خێزانە نوێیەکان
بەڕێوەبەرى پسووڵەى خۆراکى سلێمانى ڕایگەیاند، هەر خێزانێک پسوڵەى خۆراکى نەبێت لە وەرگرتنى نەوت و غاز بێبەش نابێت. بە بڕیارى قایمقامییەتى سلێمانى، ئەم خێزانانە دەتوانن لە ڕێگەی پشتگیرییەکەوە کە لە بەڕێوەبەرایەتیی پسووڵەی خۆراک بۆیان دەکرێت، نەوت و غاز لە بەڕێوەبەرایەتیی بەرهەمە نەوتییەکان وەربگرن.
بەڵگەنامە و ڕێکارە پێویستەکان
ئاراس محەمەد ڕوونیکردەوە، ئەو کەسانەی فۆڕمی خۆراکیان نییە، بۆ وەرگرتنی پشتگیری پێویستە ئەم بەڵگەنامانە پێشکەش بکەن: گرێبەستى هاوسەرگیرى، فۆڕمى خۆراکى ماڵى باوکى هەردوو هاوسەر، و کارتى نیشتمانى هەردوولا پاش گواستنەوەى خانە. هاووڵاتییان دوای وەرگرتنی پشتگیرییەکە، سەردانى بەڕێوەبەرایەتیی بەرهەمە نەوتییەکان دەکەن و لەوێ پسوڵەى وەرگرتنى نەوت و غازیان بۆ دروست دەکرێت.
هۆکاری نەبوونی پسوڵەی نوێ
ماوەى 5 ساڵە بەهۆى پڕۆسەی بە ئەلیکترۆنیکردنى پسوڵەى خۆراک، هیچ پسوڵەیەکى نوێ بۆ ئەو کەسانە دروست نەکراوە کە لەو ماوەیەدا هاوسەرگیرییان کردووە. لەبەر ئەوەی لە ئێستادا دابەشکردنی نەوت و غازی ماڵان تەنیا لە ڕێگەی پسوڵەی خۆراکەوە ئەنجام دەدرێت، ئەم بڕیارە دراوە بۆ ئەوەی ئەو خێزانانە لە شایستە دارایی و خزمەتگوزارییەکانیان بێبەش نەبن.
