عەلوەی سلێمانی “نرخى یەک کارتۆن مۆز لە 18 هەزارەوە گەیشتووەتە 55 هەزار دینار”
SNN
بەهۆی ڕاگرتنی هەناردەی بەرهەمەکانی هیندستان لە ڕێگەی گەرووی هورمزەوە، بازاڕەکانی هەرێمی کوردستان ڕووبەڕووی کەمیی مۆز و لیمۆ و بەرزبوونەوەی بەرچاوی نرخەکانیان بوونەتەوە.
گرانبوونى مۆز و هۆکارەکانى
سەروەر عەلی، سەرۆکی سەندیکای عەلوەی سلێمانی ڕایگەیاند، ئێستا ناتوانن خواستی ناوخۆ بۆ مۆز پڕ بکەنەوە، چونکە بازرگانیی هیندستان لەگەڵ عێراق بەهۆی داخستنی گەرووی هورمزەوە ڕاگیراوە. بەگوێرەی ئامارەکان، نرخی یەک کارتۆن مۆزی 19 کیلۆیی لە 18 هەزار دینارەوە بۆ 55 هەزار دینار بەرزبووەتەوە. ئەمەش وایکردووە نرخی یەک کیلۆ مۆز لە عەلوەکاندا بگاتە 2,500 دینار و لە بازاڕەکانیشدا بە 3,000 دینار بە هاونیشتمانیان بفرۆشرێت.
دۆخى بازاڕ لە هەولێر و جێگرەوەکانى مۆز
ڕەجەب عەزیز، لە ئەنجوومەنی عەلوەی هەولێر ئاماژەی بەوە کرد، لە بازاڕەکانی هەولێریش هەمان گرفتی کەمبوونەوەی مۆز هەیە. لە ئێستادا تەنیا مۆزی ئیکوادۆری لە بازاڕەکاندا بەردەستە، کە لە ڕێگەی بەندەری مێرسینەوە هاوردە دەکرێت، بەڵام بەهۆی تێچووی زۆری گواستنەوەوە نرخەکەی زۆر گرانە. ئەمە لەکاتێکدایە بەهۆی جەنگی ئێرانەوە، هاوردەی بەشێک لە بەرهەمە خۆراکییەکان لە هیندستانەوە بۆ عێراق بەتەواوی ڕاگیراوە.
کەمیى بەرهەمى لیمۆ و مزرەمەنییەکان
جگە لە مۆز، بازاڕەکانی سەوزە و میوە گرفتی کەمیی لیمۆیان هەیە. لە سلێمانی کیلۆیەک لیمۆی تورکی بە 2,000 دینار دەفرۆشرێت، بەڵام جۆرەکەی وەک پێویست نییە. لە هەولێریش بەهۆی کەمیی بەرهەمی ناوخۆ، پشت بە هاوردەی دەرەوە بەستراوە کە نرخەکانیان بەرزە و هاونیشتمانیان لە جۆرەکەی ڕازی نین. ساڵانە عێراق بەبەهای زیاتر لە 544 ملیۆن دۆلار مزرەمەنییەکان لە تورکیا و ئێرانەوە هاوردە دەکات، بەڵام ئێستا پچڕان لە دابینکردنیاندا دروستبووە.
ئامارەکانى هاوردەکردنى مۆز لە عێراق
عێراق لەسەر ئاستی وڵاتانی عەرەبی دووەم و لەسەر ئاستی جیهان 16ـەیەمین وڵاتە بۆ هاوردەکردنی مۆز، کە ساڵانە بەبەهای زیاتر لە 200 ملیۆن دۆلار هاوردەی دەکات. لەو بڕە، بەبەهای زیاتر لە 117 ملیۆن دۆلار مۆز تەنیا لە هیندستانەوە دەهێندرێت. داخستنی ڕێگە بازرگانییەکان وایکردووە ئەو وڵاتە نەتوانێت وەک پێشتر پێداویستییەکانی بازاڕی عێراق و هەرێمی کوردستان دابین بکات، ئەمەش بارگرانی دارایی بۆ بەکاربەران دروست کردووە
