SNN-
بافڵ جەلال تاڵەبانی، سەرۆکی یەکێتیی نیشتمانیی کوردستان، لە بەغدا پێشوازی لە محەمەد سەمعان ئاغا، سەرۆکی بەرەی تورکمانی کرد. هەردوولا جەختیان لە گرنگیی پێکهێنانی حکومەتێکی خزمەتگوزار و پاراستنی عێراق لە ئاڵۆزییەکانی ناوچەکە کردەوە.
دیدارێک لە ماڵی مام
ئەمڕۆ دووشەممە 13-04-2026، بافڵ جەلال تاڵەبانی لە “ماڵی مام” لە شاری بەغداد، پێشوازی لە محەمەد سەمعان ئاغا، سەرۆکی بەرەی تورکمانیی عێراقی کرد. لە دیدارەکەدا دکتۆر خالید شوانی، وەزیری دادی عێراقیش ئامادە بوو تاوەکوو پێکەوە پەرەسەندنە سیاسییەکانی وڵات تاوتوێ بکەن.
دوورخستنەوەی وڵات لە شەڕ
لە کۆبوونەوەکەدا بە وردی هەڵسەنگاندن بۆ دۆخی عێراق و ناوچەکە کرا. بافڵ جەلال تاڵەبانی و سەرۆکی بەرەی تورکمانی هاوڕا بوون کە لەم بارودۆخە هەستیارەدا، ئەرکی هەمووانە کار بکەن بۆ دوورخستنەوەی عێراق لە ململانێ و جەنگەکان، تاوەکوو سەقامگیریی ناوخۆیی وڵات پارێزراو بێت.
حکومەتێکی خزمەتگوزار و نیشتمانی
تەوەرێکی دیکەی دیدارەکە، باسکردنی هەنگاوە دەستوورییەکان بوو. هەردوولا دووپاتیان کردەوە کە پێویستە ڕێکارە یاساییەکان تەواو بکرێن و بە زووترین کات حکومەتێکی نیشتمانیی خزمەتگوزار پێکبهێنرێت. جەختیان کردەوە کە ئامانجی ئەم حکومەتە دەبێت دابینکردنی ژیانێکی شایستە، خۆشگوزەرانی و ئارامی بێت بۆ تەواوی پێکهاتەکانی گەلی عێراق.
