سەرپەرشتیاری بایۆمەتری سلێمانی: لیستی مووچەی سلێمانی ئەمڕۆ تەواو دەکرێت

SNN-

ئامادەکردنی لیستی مووچەی مانگی نیسانی فەرمانبەرانی هەرێمی کوردستان گەیشتووەتە قۆناغی کۆتایی و بڕیارە تاوەکو سەرەتای هەفتەی داهاتوو کارەکانی هەولێر و سلێمانی بە تەواوی کۆتاییان بێت.

تەواوبوونی 90%ـی کارەکانی سلێمانی

یادگار جەبار، سەرپەرشتیاری بایۆمەتری سلێمانی ڕایگەیاند، سیستمی پەیڕۆڵ بۆ ئامادەکردنی لیستی مووچە کارا کراوە و 90%ـی کارەکان تەواوبوون. ئاماژەی بەوەش کرد کە لیستەکان لەلایەن گەنجینەکانەوە وردبینییان بۆ کراوە و پەسەند کراون.

کارکردن لەسەر بەڕێوەبەرایەتییە ماوەکان

سەرپەرشتیاری بایۆمەتری سلێمانی ڕوونی کردەوە، لە کۆی زیاتر لە 570 بەڕێوەبەرایەتی، تەنیا 18 بەڕێوەبەرایەتی کارەکانیان ماوە. بڕیارە ئەمڕۆ پێنجشەممە کارەکانی ئەو بەڕێوەبەرایەتییانەش تەواو بکرێن و ڕەوانەی گەنجینەکان بکرێن بۆ وردبینی و پەسەندکردنی کۆتایی.

دۆخی ئامادەکردنی لیستەکە لە هەولێر

سەرچاوەیەک لە بایۆمەتری هەولێریش رایگەیاند، زۆرینەی کارەکانی لیستی مووچەی مانگی نیسان تەواو بوون. بەڵام ئاماژەی بەوە کرد کە تەواوبوونی 100%ـی کارەکان دەکەوێتە سەرەتای هەفتەی داهاتوو.

مەرجەکانی بەغدا بۆ خەرجکردنی مووچە

بۆ خەرجکردنی مووچەی فەرمانبەران، حکومەتی هەرێمی کوردستان پابەند کراوە بە جێبەجێکردنی چەند مەرجێک، لەوانە: ناردنی لیستی مووچە و تەرازووی پێداچوونەوەی مانگانە. هەروەها ڕادەستکردنی نەوت و ڕەوانەکردنی بڕی 120 ملیار دینار لە داهاتی نانەوتیی مانگانە بۆ گەنجینەی فیدراڵی عێراق