بەڕێوەبەری بەشە خۆراکی سلێمانی: دوو بەشە زەیت دابەشدەکرێت و نرخەکەی لە بازاڕدا دابەزیوە

SNN-

بەڕێوەبەرایەتی دابەشکردنی خۆراکی سلێمانی نوێترین زانیاری لەسەر دابەشکردنی بەشە خۆراکی مانگانەی هاوڵاتییان بڵاودەکاتەوە و ئاماژە بەوە دەکات کە پرۆسەکە گەیشتووەتە قۆناغی کۆتایی.

تەواوبوونی بەشە زەیتی ساڵی ڕابردوو

کامەران فەتاح، بەڕێوەبەری دابەشکردنی خۆراک لە سلێمانی لە لێدوانێکی تایبەتدا بۆ (SNN) ڕایگەیاند: “دابەشکردنی زەیتی مانگی هەشتی 2025 لە دەرەوەی سلێمانی بە تەواوی کۆتایی هاتووە. لە ناو شاریشدا پرۆسەکە بەردەوامە و ئەمڕۆ گەیشتووەتە بریکاری بنکەی 270، پێشبینیش دەکەین هەفتەی داهاتوو ئەم قۆناغە بەتەواوی تەواو ببێت.”

دەستپێکردنی دابەشکردنی بەشە زەیتی 2026

ئاشکرایکردووە، دەستبەجێ دوای تەواوبونی زەیتی مانگی هەشت دەست بە دابەشکردنی زەیتی مانگی یەکی ئەمساڵ دەکەین، وتیشی: “رۆژانە زەیتێکی زۆر دەگاتە لامان و راستەوخۆ دابەشی دەکەین بەسەر بریکارەکانی خۆراکدا.”

کاریگەری لەسەر بازاڕ

بە وتەی کامەران فەتاح، گەیشتنی ئەم دوو بڕە زەیتە و دابەشکردنیان بەسەر هاووڵاتییاندا کاریگەری ڕاستەوخۆی هەبووە لەسەر نرخەکانی ناو بازاڕ، بە جۆرێک لە ئێستادا نرخی زەیت لە بازاڕەکانی هەرێمی کوردستان ڕووی لە دابەزین کردووە.