کاروان گەزنەیی: پارتی لەبری پیرۆزبایی، سکاڵای لەسەر ڕێبوار تەها تۆمار کرد

SNN

کاروان گەزنەیی، گوتەبێژی یەکێتیی نیشتمانیی کوردستان ڕایگەیاند، پڕۆسەی پێکهێنانی کابینەی دەیەمی حکومەتی هەرێمی کوردستان لەسەر بنەمای ئەنجامی هەڵبژاردن و ژمارەی کورسییەکان دەستپێدەکات. هاوکات ڕەخنەی تووندی لە پارتی دیموکراتی کوردستان گرت سەبارەت بە مامەڵەکردنیان لەگەڵ دۆسیەی کەرکووک.

کابینەی نوێ و بنەمای کورسی
ئەمڕۆ پێنجشەممە 16-04-2026، کاروان گەزنەیی لە کۆنگرەیەکی ڕۆژنامەوانیدا ڕایگەیاند، قۆناغێکی نوێ بۆ پێکهێنانی کابینەی دەیەمی حکومەتی هەرێم دەستپێدەکات و وتی: “پێکهێنانی حکومەت لەسەر بنەمای ئیستحقاقی کورسی دەبێت.” گوتەبێژی یەکێتی هیوای خواست حکومەتێکی نوێی خزمەتگوزار پێکبهێنرێت کە وەڵامدەرەوەی خواستەکانی هاووڵاتییان بێت.

پارتی و دۆسیەی کەرکووک
کاروان گەزنەیی ڕەخنەی توندی لە هەڵوێستەکانی پارتی گرت لە کەرکووک و ئاشکرای کرد کە “پارتی تەنانەت پیرۆزباییەکیشی لە ڕێبوار تەها نەکرد دوای دەستبەکاربوونی وەک پارێزگار، بەڵکو بە پێچەوانەوە سکاڵای یاساییان لەسەر تۆمار کردووە.” ناوبراو جەختی کردەوە کە ئەو هەوڵانەی ئێستا دەدرێن، تەنیا بۆ نانەوەی ئاژاوەیە لە شارەکەدا.

ئاڵوگۆڕی پۆستی پارێزگار
سەبارەت بە گۆڕانکارییەکانی ناوخۆی کەرکووک، گوتەبێژی یەکێتی ڕایگەیاند کە ئەمڕۆ ئاڵوگۆڕ لە پۆستی پارێزگاردا دەکرێت. ئەو ڕوونی کردەوە کە “ئەم ئاڵوگۆڕە پەیوەندی بە پۆستی سەرۆککۆمارەوە نییە، بەڵکو جێبەجێکردنی ڕێککەوتنی ساڵی 2024ـە.” گەزنەیی وتیشی، لای یەکێتی ئاڵوگۆڕی پۆست پڕۆسەیەکی دیموکراسییە نەک کەرەستەیەک بۆ چەواشەکاری.

پەیامێک بۆ سەقامگیری
لە کۆتایی قسەکانیدا، کاروان گەزنەیی دووپاتی کردەوە کە یەکێتی کار بۆ پاراستنی سەقامگیریی کەرکووک و هەرێمی کوردستان دەکات. ئاماژەی بەوەش کرد کە دەبێت هەموو لایەنەکان بە گیانی بەرپرسیارێتییەوە مامەڵە لەگەڵ قۆناغی داهاتوو بکەن، تاوەکوو پڕۆسەی سیاسی و خزمەتگوزاری لە وڵاتدا پەکینەکەوێت.