بافڵ جەلال تاڵەبانی: لە سلێمانی کەس چەکی نەدزیوە و ئیدارەی ئەمریکا دەتوانێت ئەمە پشتڕاست بکاتەوە

SNN

بافڵ جەلال تاڵەبانی لە میانی چاوپێکەوتنێکدا لەگەڵ پێرس مۆرگان، وەڵامی دۆناڵد ترەمپ لەبارەی دزینی چەک دەداتەوە لەلایەن کوردەەوە و تێڕوانینی خۆی لەسەر ئاڵۆزییەکانی ڕۆژهەڵاتی ناوەڕاست و پرسی گۆڕینی دەسەڵات لە ئێران دەخاتە ڕوو.

وەڵامی تۆمەتەکانی دۆناڵد ترەمپ

لە سەرەتای بەرنامەی “ئەنسێنسەرد”، پێرس مۆرگان ئاماژەی بە قسەکانی دۆناڵد ترەمپ کرد کە گوتبووی ئەمریکا هەوڵی داوە ئێرانییەکان لە ڕێگەی ناردنی چەک بۆ کورد چەکدار بکات، بەڵام کوردەکان چەکەکانیان دزیوە. بافڵ جەلال تاڵەبانی لە وەڵامدا ڕایگەیاند، ئەو چەکانەی نەدزیوە و دەتوانێت بۆ لایەنی سلێمانی ئەوە بسەلمێنێت کە هیچ کەسێک دەستی بۆ ئەو چەکانە نەبردووە، ئاماژەی بەوەش کرد کە بەرپرسانی ئیدارەی ئەمریکا دەتوانن ئەمە پشتڕاست بکەنەوە.

ناسنامەی سیاسیی هەرێمی کوردستان

سەرۆکی یەکێتی لەبارەی دۆخی هەرێمی کوردستانەوە ئاماژەی بەوە کرد، کوردستان هەڵگری چیرۆکی دژبەیەکە، بە جۆرێک وڵاتە و وڵاتیش نییە، حکومەتی هەیە بەڵام لە ڕاستیدا حکومەت نییە. سەبارەت بە قسەکانی ترەمپیش گوتی، ئەگەر دزیی وا کرابێت ئەوە “شەرمەزارییە”، چونکە بەکارهێنانی کورد وەک قەڵغان بیرۆکەیەکی خراپ بوو، بەڵام دزیی لە هاوپەیمانان بابەتێکی تەواو جیاوازە و پێیوایە لێکەوتەی دەبێت.

تێڕوانین بۆ شەڕی ڕۆژهەڵاتی ناوەڕاست

لەبارەی تێپەڕبوونی 6 هەفتە بەسەر جەنگە فراوانەکەدا، بافڵ جەلال تاڵەبانی ڕایگەیاند، پێویستە ئارامگری هەبێت. پێشنیاری کرد کە ئەمریکا لە جیاتی سەرکەوتنی بچووک، هەوڵ بۆ “ڕێککەوتنێکی گەورەتر” بدات کە ڕەگ و ڕیشەی ململانێکان چارەسەر بکات، لەوانە پرسی فەڵەستین و لوبنان. ئاماژەی بەوەش کرد کە دونیابینیی ترەمپ ئاماژەی تێدایە بۆ ئەم جۆرە ڕێککەوتنانە و ئەگەر ئارامگرییان هەبێت، ئەنجامەکان لە بەرژەوەندیی کۆمارییەکان دەبێت.

پرسی گۆڕینی دەسەڵات لە ئێران

سەبارەت بەو سیناریۆیەی باس لەوە دەکات کە کوشتنی سەرکردەکان و ئایەتوڵڵاکان دەبێتە هۆی ڕووخانی ڕژێمی ئێران، بافڵ جەلال تاڵەبانی جەختی کردەوە کە باوەڕی بەو سیناریۆیە نییە. ڕایگەیاند، هێرشە ئاسمانییەکان کاریگەریی پێچەوانەیان هەبووە و خەڵکی ئێران لە کاتی وێرانبوونی قوتابخانە و نەخۆشخانەکاندا، بۆ وڵات و خاکەکەیان یەکدەگرن نەک بۆ دەسەڵات. بە گوتەی تاڵەبانی، ناتوانرێت بە بۆردوومانکردن خەڵک وا لێ بکرێت لایەنی هێرشبەریان خۆشبوێت.

سەرچاوەی زانیارییەکان و دانوستانەکان

سەرۆکی یەکێتی هۆشداری دا لەوەی کە تەنیا گوێ لەو ئێرانییانە بگرن کە لە ئەمریکا و تاراوگە دەژین، چونکە ڕەنگە زانیارییەکانیان بۆ دۆخی ئێستا گونجاو نەبێت. ئاماژەی بەوە کرد کە ئەمریکا هەواڵگری و هاوڕێی باشی لە ناوچەکە هەیە کە دەبێت گوێیان لێ بگرێت. هەروەها گەشبینی خۆی دەربڕی کە تیمێکی پاکستانی بۆ بەردەوامبوونی دانوستانەکان دەچنە تاران و ڕایگەیاند، پێشکەوتنی باش لەسەر پرسە بچووکەکان بەدەست هاتووە.

کۆتاییهێنان بە توندوتیژی

لە کۆتایی گفتوگۆکەدا، بافڵ جەلال تاڵەبانی باسی لەوە کرد کە وادەی ئاگربەست “لەسەر بەرد نەنووسراوە” و دەکرێت درێژ بکرێتەوە. هیوای خواست خەڵک ژیرانە بیر بکەنەوە و تێبگەن کە ئەم ململانێیە بە توندوتیژی چارەسەر نابێت. پێرس مۆرگانیش سوپاسی کرد و ئاماژەی بەوە کرد کە تاڵەبانی تاکە میوانە کە بەردەوام بە ڕێزەوە ناوی دەهێنێت.