بەهەوڵی فراكسیۆنی یەكێتی وەزارەتی تەندروستی عێراق نەخۆشخانەیەكی 100 قەڕەوێڵەیی دروستدەكات

عەلی حەمە سەعید-SNN

بڕیاردەری فراكسیۆنی یەكێتی لە ئەنجومەنی نوێنەرانی عێراق ئاماژەبەوەدەكات، لەسەر داوای ئێمە و بەهەوڵی بەردەوامی فراكسیۆنەكەمان،رەزامەندیمان وەرگرت بۆ دروستكردنی نەخۆشخخانەیەكی 100 قەرەوێڵەیی بۆ خانەقین و هاوكات وەزیری تەندروستی عێراق بڕیاریدا بە دابینكردنی دەرمان بۆ 300 تووشبووی نەخۆشی (هیمۆفیلیا) روونبوونەوەی خوێن بۆ نەخۆشخانەی هیوا.

سروە محەمەد، بڕیاردەری فراكسیۆنی یەكێتی لەئەنجومەنی نوێنەرانی عێراق، بە SNNی راگەیاند: دوای ئەوەی سەردانی دكتۆر ساڵح مەهدی حەسناوی وەزارەتی تەندروستی حكومەتی عێراقیم كردوو لەگەڵ وەزیری تەندروستی كۆبوونەوە، دواجار توانیمان ڕەزامەندی وەزارەتی تەندروستی عێراق وەربگرین بۆدروستكردنی نەخۆشخانەیەكی ( ١٠٠ ) قەروێڵەیی بۆ قەزای خانەقین .

ئاماژەی بەوەشكرد، دوای وەرگرتنی ئەو رەزامەندییە، وەزیری تەندروستی نوسراو ئاراستەی بەڕێوەبەرایەتی پلاندانانی عێراق كردووە بەمەبەستی جێبەجێكردنی دروستكردنی ئەو نەخۆشخانەیە، كە پێداویستییەكی هەنووكەیی ناوچەكەیە و ئێمەش بەڵێنمان بە هاووڵاتیانی سنوركە داوە كە داواكارییەكانیان بگەیەنین بە لایەنی پەیوەندیدار.

بڕیاردەری فراكسیۆنی یەكێتی لە ئەنجومەنی نوێنەرانی عێراق ئەوەشی خستەڕوو، هەر لەو سەردانەماندا بۆلای وەزیری تەندروستی عێراق توانیمان رەزامەندی وەزیری تەندروستی وەربگرین بە دابینكردنی دەرمان و پێداویستی پزیشكی بۆ 300 تووشبووی نەخۆشی (هیمۆفیلیا) روونبوونەوەی خوێن بۆ نەخۆشخانەی هیوا لەسلێمانی، كە ئەوەش بەهەمان شێوەیە كەیەكێكە لە پێداویستییەكانی ئەو نەخۆشخانەیە