سبەی چوارشەممە؛ ڕۆژی یەکلاکردنەوەی بەربژێری سەرۆکوەزیران لە ناو چوارچێوەی هەماهەنگی

SNN

چوارچێوەی هەماهەنگی بۆ یەکلاییکردنەوەی پۆستی سەرۆکوەزیرانی داهاتووی عێراق لە کۆبوونەوەدایە و بەپێی زانیارییەکان، لە ئێستادا دوو بەربژێر لە کێبڕکێدایە بۆ وەرگرتنی ئەو پۆستە، بەڵام تاوەکو ئێستا هیچ کامێکیان دەنگی پێویستیان بۆ ڕاسپاردن بەدەستنەهێناوە.

کێبڕکێی دوو بەربژێر و نەبوونی ڕێککەوتن

ڕۆژنامەی “سەباح”ی فەرمی عێراق بڵاویکردەوە، لە کۆبوونەوەی شەوی ڕابردووی چوارچێوەی هەماهەنگیدا کە لە نووسینگەی عەممار حەکیم بەڕێوەچوو، دوو ناو بۆ وەرگرتنی پۆستی سەرۆکوەزیران خراونەتەڕوو. سەرەڕای ئەوەی یەکێکیان لە کاتی گفتوگۆکاندا چانسی زیاتر بووە، بەڵام هیچ کام لەو دوو بەربژێرە نەیانتوانیوە دەنگی پێویست بەپێی ئەو میکانیزمەی لەناو چوارچێوەدا پەیڕەو دەکرێت، بەدەستبهێنن.

وردەکاریی کۆبوونەوەکەی ماڵی حەکیم

محەمەد حسام حوسەینی، ئەندامی مەکتەبی سیاسی ڕەوتی حیکمە ڕایگەیاند، کۆبوونەوەکەی سەرکردە سیاسییەکانی ناو چوارچێوەی هەماهەنگی نزیکەی 2 کاتژمێری خایاندووە و گفتوگۆی چڕ لەنێوان لایەنەکاندا ئەنجامدراوە. ئاماژەی بەوەش کرد کە چەندین پێشنیاز و دیدگای جیاواز لەبارەی میکانیزمی هەڵبژاردنی بەربژێرەکە هەبوون، ئەمەش بووەتە هۆی ئەوەی یەکلاییکردنەوەی ناوەکە بۆ کاتێکی دیکە دوا بخرێت.

کاتی یەکلاییکردنەوەی بەربژێری کۆتایی

عەباس عامری، ئەمینداری گشتیی چوارچێوەی هەماهەنگی ڕایگەیاند، کۆبوونەوەکە ئەرێنی بووە بەڵام پرۆسەکە پێویستی بە کاتی زیاترە. بڕیار وایە کۆبوونەوەکان لە ڕۆژی سێشەممەشدا بەردەوام بن، تاوەکو لە کۆبوونەوەی ڕۆژی چوارشەممەدا بەربژێری کۆتایی بۆ پۆستی سەرۆکوەزیران بە فەرمی دیاری بکرێت و ڕابگەیەندریت.

وادە دەستوورییەکان بۆ پێکهێنانی حکومەت

بەپێی دەستووری عێراق، سەرۆککۆمار دەبێت لە ماوەی 15 ڕۆژدا بەربژێری گەورەترین کوتلە بۆ پێکهێنانی حکومەت ڕابسپێرێت. بەپێی ئەو خشتە کاتییەی دیاریکراوە، لایەنەکانی ناو چوارچێوەی هەماهەنگی تاوەکو ڕێککەوتی 26ـی نیسان دەرفەتیان لەبەردەمدایە بۆ ئەوەی ناوی بەربژێرەکەیان پێشکەش بکەن و پرۆسەی پێکهێنانی کابینەی نوێ دەست پێ بکات.

کۆبوونەوەی سودانی و مالیکی

هەر ئەمڕۆش، محەمەد شیاع سودانی، سەرۆک وەزیرانی عێراق و نوری مالیکی، سەرۆکی هاوپەیمانی دەوڵەتی یاسا، لەبارەی خێراکردنی رێکارەکانی پێکهێنانی حکومەت کۆبوونەتەوە و جەختیان لەوە کردووەتەوە کە پێویستە بەزووترین کات پێداویستییەکانی پێکهێنانی حکومەتی داهاتوو تەواو بکرێن بۆ ئەوەی دەست بە کارەکانی بکات.