وۆڵ ستریت جۆرناڵ: ئیدارەی ترەمپ ناردنی 500 ملیۆن دۆلار و هاوکارییە سەربازییەکانی بۆ عێراق ڕاگرت
دراوى 100 دۆلارى ئهمریكى | فۆتۆ: Dennis Hallinan / Alamy
SNN
واشنتۆن فشارەکانی بۆ سەر بەغداد گەیاندە لوتکە و بە ڕاگرتنی ناردنی نەختینەی دۆلار و سڕکردنی هاوکارییە سەربازییەکان، داوای کۆتاییهێنان بە چالاکییەکانی ئەو گروپە چەکدارانە دەکات کە لەلایەن ئێرانەوە پاڵپشتی دەکرێن.
ڕاگرتنی 500 ملیۆن دۆلاری نەختینە
رۆژنامەی وۆڵ ستریت جۆرناڵ-ی ئەمریکی ئەمڕۆ 22ـی نیسانی 2026 ڕایگەیاند ئیدارەی دۆناڵد ترەمپ، سەرۆکی ئەمریکا، ڕەوانەکردنی بارێکی نەختینەی دۆلاری بۆ عێراق ڕاگرتووە کە بڕەکەی نزیکەی 500 ملیۆن دۆلارە. ئەم پارەیە داهاتی فرۆشی نەوتی عێراقە کە لە ئەژمارەکانی ئەو وڵاتە لە بانکی یەدەگی فیدراڵی لە نیویۆرک پاشەکەوت کراوە و بەرپرسانی وەزارەتی خەزێنەی ئەمریکا بڕیاری ڕاگرتنیان داوە.
سڕکردنی هاوکارییە سەربازییەکانی واشنتۆن
حکومەتی ئەمریکا بە فەرمی بەغدادی ئاگادار کردووەتەوە کە پاڵپشتی دارایی بۆ چەندین بەرنامەی تایبەت بە دژە تیرۆر و مەشقی سەربازی سوپای عێراق سڕ کردووە. واشنتۆن بەردەوامیی ئەم هاوکاریانەی بەستووەتەوە بەوەی کە دەبێت هێرشی میلیشیاکان بە تەواوی کۆتایی بێت و دەسەڵاتدارانی عێراق هەنگاوی کردەیی و جدی بنێن بۆ هەڵوەشاندنەوەی ئەو گروپە چەکدارانە.
هۆکاری توندکردنی فشارەکان
ئەم هەنگاوە توندانەی ئەمریکا دوای ئەوە دێت کە لە سەرەتای ئەم مانگەدا هێرشێکی درۆنی کرایە سەر ناوەندێکی گرنگی دیپلۆماسی ئەمریکا لە بەغداد. دوای ئەو ڕووداوە و زنجیرەیەک هێرشی دیکە، واشنتۆن باڵیۆزی عێراقی بانگهێشت کرد و پەیامی توندی ئاڕاستەی حکومەتی عێراق کرد.
