بافڵ جەلال تاڵەبانی: پاراستنی ئازادیی ڕۆژنامەوانی وەفادارییە بۆ ڕێبازەکەی سەرۆک مام جەلال

SNN

بەبۆنەی یادی 128 ساڵەی دەرچوونی یەکەم ڕۆژنامەی کوردی، بافڵ جەلال تاڵەبانی پەیامێکی بڵاوکردەوە و تێیدا جەختی لە فەراهەمکردنی ژینگەیەکی لەبار و ئازاد بۆ ڕۆژنامەنووسان کردەوە.

پیرۆزبایی یادی 128 ساڵەی ڕۆژنامەگەریی کوردی
بافڵ جەلال تاڵەبانی، سەرۆکی یەکێتیی نیشتمانیی کوردستان، بەبۆنەی تێپەڕبوونی 128 ساڵ بەسەر دەرچوونی ڕۆژنامەی “کوردستان”، گەرمترین پیرۆزبایی ئاڕاستەی ڕۆژنامەنووسان کرد و ئەم یادەی بەرز نرخاند.

ئەرکی لەپێشینە بۆ پاراستنی شکۆی ڕۆژنامەنووسان
سەرۆکی یەکێتی جەختی لە ئازادیی ڕادەربڕین و پاراستنی شکۆی ڕۆژنامەنووسان کردەوە. ئاماژەی بەوەش کرد کە فەراهەمکردنی ژینگەیەکی لەباری کارکردن بۆ ئەو قەڵەمانەی بە بەرپرسیارێتی و ڕاستگۆییەوە کاردەکەن، بە ئەرکی لەپێشینەی خۆیان دەزانن.

درێژەپێدانی ڕێبازی سەرۆک مام جەلال
لە پەیامەکەدا هاتووە کە یەکێتیی نیشتمانیی کوردستان بە شانازییەوە میراتگری ڕێبازی سەرۆک مام جەلالە، کە داکۆکیکارێکی سەرسەختی ڕۆژنامەوانی ئازاد بووە. بافڵ جەلال تاڵەبانی ئاماژەی بەوە کرد کە پاراستنی ئەو ئازادییە، وەفادارییە بۆ ئەو ڕێبازەی کە لەسەری دەڕۆن.

پێزانین بۆ ماندووبوونی ڕۆژنامەنووسان
سەرۆکی یەکێتی ڕایگەیاند کە بە ڕێزەوە لە ماندووبوون و شەونخونی هەموو ئەو ڕۆژنامەنووسانە دەڕوانن کە لە چوارچێوەی بنەما چەسپاوەکانی پیشەکەیان، کارەکانیان بە ئەمانەتەوە ڕایی دەکەن و خزمەت بە گەیاندنی ڕاستییەکان دەکەن.