ئەکسیۆس: ئێران پێشنیازێکی نوێی داوەتە ئەمریکا و ترەمپ لەسەر ئەو پرسە کۆدەبێتەوە

SNN-

ماڵپەری “ئەکسیۆس” لە زاری بەرپرسێکی ئەمریکی و دوو سەرچاوەی ئاگادار بڵاویکردەوە، ئێران لە ڕێگەی نێوەندگیرانی وڵاتی پاکستانەوە پێشنیازێکی نوێی پێشکەش بە ویلایەتە یەکگرتووەکانی ئەمریکا کردووە، کە ئامانج لێی گەیشتنە بە ڕێککەوتنێک بۆ کردنەوەی گەرووی هورمز و کۆتاییهێنان بە شەڕ.

دواخستنی دۆسیەی ئەتۆمی

تاران داوای کردووە دانوستانە ئەتۆمییەکان دوابخرێن بۆ دوای کردنەوەی گەرووی هورمز و هەڵگرتنی سزاکانی سەر ئێران.

کۆتاییهێنان بە شەڕ

پێشنیازەکە داوای ئاگربەستێکی درێژخایەن یان ڕێککەوتنێکی هەمیشەیی بۆ کۆتاییهێنان بە شەڕ دەکات.

تێپەڕاندنی ناکۆکی ناوخۆیی

سەرچاوە ئەمریکییەکان ئاماژە بەوە دەکەن ئەم هەنگاوەی تاران بۆ تێپەڕاندنی ئەو ناکۆکیانەیە کە لە نێوان سەرکردەکانی ئێراندا لەسەر دۆسیەی ئەتۆمی دروست بووە.

کۆبوونەوەیەک لە کۆشکی سپی

بەپێی زانیارییەکانی ئاکسیۆس، بڕیارە ئەمڕۆ دۆناڵد ترەمپ کۆبوونەوەیەک لەگەڵ بەرپرسانی باڵای وڵاتەکەی سەبارەت بە ئێران ئەنجام بدات. چاوەڕوان دەکرێت لەو کۆبوونەوەیەدا تاوتوێی ناوەڕۆکی پێشنیازەکەی ئێران و هەنگاوەکانی داهاتووی شەڕ بکرێت.

هەرچەندە نێوەندگیرە پاکستانییەکان پێشنیازەکەیان گەیاندووەتە کۆشکی سپی، بەڵام تا ئێستا ڕوون نییە واشنتن ئامادەیە بەو مەرجانە بچێتە ناو دانوستانەوە یان نا.