ئەحمەد حاجی ڕەشید: ئەمڕۆ سەرۆكوەزیران دیاری نەكرێت موخالەفەی ئەدەبی ڕوودەدات

عەلی حەمەسەعید-SNN

سەرۆكی فراكسیۆنی كۆمەڵی دادگەری لە پەرلەمانی عێراق جەخت لەوەدەكاتەوە كە ئەگەر ئەمڕۆ چوارچێوەی هەماهەنگی نەتوانن كاندیدی سەرۆكوەزیران دیاری بكەن، لەڕووی یاساییەوە هیچ گرفتێكی گەورە ڕوونادات، تەنها جۆرێك لە ” موخالەفەی ئەدەبی” ڕوودەدات.

ئەحمەد حاجی ڕەشید، سەرۆكی فراكسیۆنی كۆمەڵی دادگەری لە ئەنجومەنی نوێنەرانی عێراق بە SNN-ی ڕاگەیاند: ئەگەر ئەمڕۆ چوارچێوەی هەماهەنگی نەوتوانن كاندیدی سەرۆكوەزیران هەڵبژێرن ئەوا جۆرێك لە پێشێلی دەستنوری ڕوودەدات، بەڵام بەو واتایە ناكە گرفتێكی گەورە ڕووبدات و كۆتایی دنیا بێت.

ئاماژەی بەوەشكرد، ئەگەر چوارچێوەی هەماهەنگی نەتوانن ئەمڕۆ ئەو بابەتە یەكلایی بكەنەوە، ئەوا جۆرێك لە ” موخالەفەری ئەدەبی” پێدەوترێت لەچوارچێوەی یاسایی و دەستوریدا، بەڵام دواجار هیچ گرفتێكی یاسایی دروستناكات.

وتەكانی سەرۆكی فراكسیۆنی كۆمەڵی دادگەری لە ئەنجومەنی نوێنەرانی عێراق لەكاتێكدایە كە ئەمڕۆ دواوادەی یاساییە بۆ دیاریكردنی كاندیدی سەرۆكوەزیران لەلایەن چوار چێوەی هەماهەنگی، ئەوەش دوای ئەوەی تا ئێستا چەندین كۆبوونەوەی تایبەت بەو پرسەیان ئەنجامداوە بەڵام نەیانتوانیوە بگەنە ڕێككەوتنی كۆتایی و دیاریكردنی كەسێك بۆ پێكهێنانی كابینەی نوێی حكومەتی عێراق.