نەبیل مەرسومی: بڕێکی زۆر دۆلار گەیشتە بەغدا و هەفتەی داهاتوو بەهای دینار بەرز دەبێتەوە

SNN-

نەبیل مەرسوومی، شارەزای دیاری ئابووری عێراق، زانیاری نوێی لەبارەی گەیشتنی شێوازێکی نوێی پاڵپشتیی دارایی ئەمریکا بۆ عێراق ئاشکرا کرد و پێشبینی دەکات نرخی دۆلار دابەزین بەخۆیەوە ببینێت.

پاڵپشتی واشنتن بۆ حکومەتی داهاتوو

نەبیل مەرسومی، لە بڵاوکراوەیەکدا ئاماژەی بەوە کردووە: “لە چوارچێوەی پاڵپشتییەکانی ئەمریکا بۆ حکومەتی داهاتوو، دوێنێ بارێکی نوێی دۆلاری نەختینە (کاش) گەیشتووەتە شاری بەغدا”.

عێراق مانگانە چەند دۆلاری دەستدەکەوێت؟

ئەو شارەزا ئابوورییە ڕوونیکردەوە، عێراق مانگانە بڕی یەک ملیار دۆلاری نەختینە لە ئەمریکاوە وەردەگرێت، کە ئەم بڕە پارەیە بەسەر دوو قۆناغی جیاوازدا دابەش کراوە و دەگاتە دەست بانکی ناوەندی.

پێشبینی بۆ نرخی دینار

مەرسومی جەختی لەوە کردەوە کە گەیشتنی ئەم شێوازە نەختینەییە لەم کاتەدا، کاریگەری ئەرێنی دەبێت لەسەر بازاڕەکان و پێشبینی دەکرێت لە هەفتەی داهاتوودا ببێتە هۆی باشتربوونی بەهای دیناری عێراقی و دابەزینی نرخی دۆلار بەرامبەر بە دراوی نیشتمانی.