وادەی ناردنی داهاتی نانەوتی و بڕەكەی دیاریكرا..SNNوادەی دابەشكردنی مووچە ئاشكرادەكات

عەلی حەمە سەعید-SNN

بەرپرسێكی وەزارەتی دارایی هەرێم ئاشكرایدەكات كە سبەی یان دوو سبەی بڕی زیاتر لە 50 ملیار دینار وەك داهاتی نانەوتی بۆ مانگی نیسان ڕەوانەی بەغدا دەكرێت، هاوكات لە هەفتەی داهاتووشەوە دابەشكردنی مووچە دەستپێدەكات.

بەگوێرەی ئەو زانیارییانەی كە لە بەرپرسیكی وەزارەتی دارایی بە SNNدراون ئەوە خراوەتەڕوو، شاندی تەكنیكی وەزارەتی دارایی هەرێم ئەوەیان لەگەڵ وەزارەتی دارایی عێراق یەكلایی كردووەتەوە كە بۆ مانگی چواریش هەرێم لە توانایدا نابێت 120 ملیار دینار وەك داهاتی نانەوتی ڕەوانەی بەغدا بكات.

ئاماژەی بەوەشكرد، هەردوولا رازی بوون لەسەر ئەوەی كە بۆ مانگەی چوار بڕی زیاتر لە 50 ملیار دینار ڕەوانە بكرێت كە لە نێوان 55 بۆ 60 ملیار دینارە، هاوكات سبەی سێ شەممە ئەو بڕە پارەیە دەخرێتە سەر هەژماری تایبەتی وەزارەتی دارایی و ئەگەریش سبەی نەتواندرا ئەو كارە بكرێت بە دڵنیایی ڕۆژی چوار شەممە پارەكە ڕەوانەی بەغدا دەكرێت.

بەپرسەكەی وەزارەتی دارایی هەرێم ئەوەشی خستەڕوو، ناردنی پارە لە لایەن بەغداوە بۆ هەرێم دەكەوێتە سەرەتای هەفتەی داهاتوو، بۆیە بەدڵنیاییەوە دابەشكردنی مووچەش هەر لە هەفتەی داهاتوو دەستپێدەكات كە پێدەچێت لە ناوەڕاستی هەفتەی داهاتوو تا كۆتایی هەفتە دابەشكردنی مووچە كۆتایی پێبێت