ترەمپ بژاردەی سێیەمی نەهێشتەوە؛ یان ڕێککەوتنێکی خێرا یان وێرانکردنی ئێران

SNN-

ماڵپەڕی ئەکسیۆس هۆشدارییەکی ئەمریکای ڕاگەیەند، هەر هەوڵێکی ئێران بۆ ڕێگری لە کەشتییەکان لە گەرووی هورمز، وەک “دەستدرێژی” هەژمار دەکرێت.

بژاردە یەکلاکەرەوەکانی بەردەم ئێران

ماڵپەڕی ئەکسیۆس لە زاری سەرچاوەیەکی نزیک لە دۆناڵد ترەمپ، سەرۆکی ئەمریکا بڵاویکردەوە، ئێران تەنیا دوو ڕێگەی لەبەردەمدایە؛ یان ئەوەتا دەبێت بەمزووانە نیشانەکانی ڕێککەوتنێکی سیاسی دەربکەون، یان ئەوەتا ئەمریکا بە شێوەیەکی وێرانکەر دەست بە بۆردوومانکردنی ئەو وڵاتە دەکات.

چارەنووسی مووشەک و بەلەمە خێراکان

سەرچاوەکە ئاماژەی بەوە کردووە، ئۆپەراسیۆنی هاوکاریکردنی کەشتییەکان لە گەرووی هورمز دەکرێت ببێتە سەرەتایەک بۆ ڕووبەڕووبوونەوەی ڕاستەوخۆ. هۆشداریش دەدات کە هەر مووشەکێک یان بەلەمێکی خێرای ئێران کە بەرامبەر تێپەڕبوونی کەشتییە جەنگییەکان لە گەرووەکەدا ئاراستە بکرێت، دەستبەجێ لەناودەبرێت و ئێران وەک لایەنی دەستدرێژکار مامەڵەی لەگەڵ دەکرێت.

پڕۆژەی ئازادی و کاردانەوەی تاران

ئەم پێشهاتانە دوای ئەوە دێن کە شەوی ڕابردوو دۆناڵد ترەمپ پڕۆژەی “ئازادی” لە گەرووی هورمز ڕاگەیاند، بە مەبەستی ڕزگارکردن و پاراستنی ئەو کەشتییانەی لەو سنوورەدا گیریانخواردووە. لە بەرامبەردا، لایەنی ئێرانی بە فەرمی ڕایگەیاندووە کە ڕێگە نادەن هیچ کەشتییەک بەبێ هەماهەنگی لەگەڵ هێزەکانیان بە گەرووەکەدا تێپەڕێت