لە سنوری بادینان پارتی بارەگاکانی كردووەتە دادگا و بەڵێننامە بە گوندنشینان پڕدەكاتەوە نەگەڕێنەوە شوێنەكانی خۆیان

عەلی حەمە سەعید-SNN

لەگەڵ ئەوەی تاڕاددەیەكی زۆر بارودۆخی ئەمنی سنورەكە ئارامە و ئەگەری پێكدانانی چەكداری نەماوە و پرۆسەی ئاشتی قۆناغی زۆر باشی بڕیوە، بەڵام پارتی ڕێگرە لە گەڕانەوەی گوندنشینانی سنوری بادینان بۆسەر زێدی خۆیان، هەر گوندنشینێكیش بەنیازی گەڕانەوە بێت بانگهێشی بارەگاكانی پارتی دەكرێت و بەڵێننامەی پێپڕدەكرێتەوە نەگەڕێتەوە.

بەگوێرەی زانیاری و بەدواداچوونەكانی SNNپارتی دیموكراتی كوردستان لە سنوری بادینان بە تایبەت گوندنشینانی سنوری شیلادزێ‌ و ئامێدی و بەری گارە و چەند ناوچەیەكی دیكە، ڕێگرە لەوەی كە گوندنشینان بگەڕێنەوە سەر زێدی خۆیان كە بۆماوەیەكی زۆرە گوندەكانیان جێهێشتووە بەهۆی هێرشەكانی توركیاوە بۆ ناوچەكە، هاوكات بەر لە چەند ڕۆژێك ژمارەیەك لە گوندنشینان ئامادەكارییان كردووە بۆ گەڕانەوە بەڵام پارتی ئاگاداری كردوونەتەوە كە كارێكی وا نەكەن.

ئاماژە بەوەشكراوە، ژمارەیەك لەو گوندنشینانە سوربوون لەسەر گەڕانەوەیان بۆ گوندەكانیان، بەڵام پارتی لەڕێگەی هێزە وە فشاری لەسەر دروستكردوون و دواجار ئەو گوندنشینانەی بانگهێشتی بارەگاکانی پارتی كردووە بۆ ئەوەی لەوێ‌ بەڵێننامە پڕبكەنەوە كە نابێت بیر لەگەڕانەوە بكەنەوە بۆ گوندەكانیان، لەكاتێكدا پڕكردنەوەی بەڵێننامە لە دادگاكان دەكرێت بەڵام پارتی بارەگاكانی لە بری داگاكان بەكار دێنێت و هیچ واتایەكی بۆ دادگاكان نەهێشتووەتەوە.

هەر لە زانیارییەكانی SNNئەوەشهاتووە،  ئەو كارەی توركیا لەسەر داواكاری توركیایە و سەرەڕای ڕێگری لە گەڕانەوەی گوندنشینانیش لەهەمان كاتدا پارتی هەماهەنگی تەواوی لەگەڵ سوپای توركیا هەیە بۆ دروستكردنی بنكە و بارەگای سەربازی نوێ‌ لە سنورەكە سەڕەرای ئەوەی كە گوندنشینان زۆر نیگەرانن لەوكارەی پارتی.