وەزارەتی نەوتی عێراق: ئەو تۆمەتانە رەتدكەینەوە ئاڕاستەی بریكاری وەزارەتی نەوت کراوە

SNN
وەزارەتی نەوتی عێراق لە روونكردنەوەیەكدا ئەو تۆمەتانە رەتدەکاتەوە کە ئاڕاستەی عەلی مەعارج بەهادلی، بریكاری وەزارەتی نەوت بۆ کاروباری دابەشکردن کراوە.

وەزارەت وێڕای دووپاتکردنەوەی رێزی تەواوی خۆی بۆ رێکارە یاساییەکان و دەسەڵاتی دادوەری عێراق، جەخت لەسەر گرنگی شەفافیەت و لێپرسینەوە دەکاتەوە لە چارەسەرکردنی هەموو پرس و تۆمەتەکان لەسەر بنەمای بەڵگە و ڕاستییەکان، دوور لە هەر حسابات و لێکدانەوەیەکی دیکە.

وەزارەت ئامادەیی تەواوی خۆی بۆ هاوکاریکردن و ئەنجامدانی هەر بەدواداچوونێکی دادپەروەرانە رادەگەیەنێت، لە سۆنگەی باوەڕی بە رۆڵی دەسەڵاتی دادوەری عێراق و دەستەی دەستپاکی و رێزگرتن لە دامەزراوە چاودێری و یاساییەکانی دەوڵەت.

وەزارەت جەختدەكاتەوە، کارەکانی هەناردەکردن و بەبازاڕکردنی نەوتی خاو، بارکردنی تانکەرەکان و رێکارە پەیوەندیدارەکان لە چوارچێوەی بریکاری وەزیری نەوت بۆ کاروباری دابەشکردندا نین، ئەم بابەتانە لەلایەن دامەزراوە و کۆمپانیا تایبەتمەندەکانەوە بەپێی رێکار و میکانیزمە پیادەكراوەكان مامەڵەیان لەگەڵ دەکرێت.

ئاماژە بەوە دەکات کۆمپانیای بە بازاڕکردنی نەوتی عێراق (سۆمۆ) بەیاننامەیەکی بڵاوکردووەتەوە کە میکانیزمەکانی هەناردەکردن و بەبازاڕکردنی روونکردووەتەوەو ئەو تۆمەتانەشی رەتكردەوە کە سەبارەت بەو پرسە پێشتر باسکراوە.