قەیرانی خۆراک لە جیهاندا سەرهەڵدەدات
SNN
ڕێکخراوی خۆراک و کشتوکاڵی سەر بە نەتەوە یەکگرتووەکان (فاو) ڕایگەیاند: پێوەرەکانی نرخی خۆراک لە مانگی نیسانی ڕابردوودا بە ڕێژەی 2٪ بەراورد بە هەمان کاتی ساڵی ڕابردوو بەرزبووەتەوە، ئەمەش بەرزترین ئاستی تۆمارکراوە لە دوای ساڵی 2023ـەوە.
بەپێی بەیاننامەیەکی فاو، “ڕۆنە ڕووەکییەکان” پشکی شێریان لەم بەرزبوونەوەیە بەرکەوتووە. ڕێکخراوەکە هۆکارەکەی بۆ بەرزبوونەوەی نرخی نەوتی خاو دەگەڕێنێتەوە، کە وایکردووە خواست لەسەر ڕۆنی تۆوەکان لە پیشەسازیی “سووتەمەنی بایۆلۆژی”دا زیاد بکات. هەروەها نیگەرانییەکان لە کەمیی بەرهەمهێنان لە وڵاتانی باشووری ڕۆژهەڵاتی ئاسیا، هۆکارێکی تری گرانبوونی نرخەکانن.
لە لایەکی دیکەوە، نرخی گەنم بە ڕێژەی ٠08٪ بەرزبووەتەوە. فاو ئاماژە بەوە دەکات کە وشکەساڵی لە ویلایەتە یەکگرتووەکانی ئەمریکا و ئوسترالیا، لەگەڵ بەرزبوونەوەی نرخی پەینی کیمیایی بەهۆی کاریگەرییەکانی جەنگەوە، فشارێکی زۆریان خستووەتە سەر بازاڕی گەنم.
لە کۆتایی بەیاننامەکەدا هۆشداری دراوە کە ئەگەری هەیە ئەمساڵ جوتیاران واز لە چاندنی گەنم بهێنن و ڕوو لەو بەرهەمانە بکەن کە پێویستییان بە پەینی کیمیایی کەمترە، ئەمەش دەبێتە هۆی کەمبوونەوەی خستنەڕووی گەنم لە بازاڕەکاندا و دووبارە بەرزبوونەوەی نرخەکەی لە ئاییندەدا.
