وەزارەتی ناوخۆ مژدەیەک دەداتە هاوڵاتیان و بازرگانان و سزایەکی دارایی هەڵدەگرێت

SNN –

وەزارەتی ناوخۆی حکومەتی هەرێمی کوردستان، بڕیارێکی نوێی بۆ بەرژەوەندی هاووڵاتییان و بازرگانان دەرکرد و تێیدا سزای دارایی لەسەر هاوردەکردنی ئۆتۆمبێل و ماتۆرسکیل هەڵگرت کە بەهۆی بارودۆخی شەڕەوە کێشەیان بۆ دروستبوو بوو.

بە گوێرەی فەرمانی وزاری ژمارە (13935 لە 13-5-2026)، کە بە واژووی ڕێبەر ئەحمەد، وەزیری ناوخۆ دەرچووە، بڕیاردرا بە:

درێژکردنەوەی ماوەی تۆمارکردن

ماوەی ساڵێک تۆمارکردن درێژکرایەوە بۆ ئەو بازرگان و خاوەن کۆمپانیا و پێشەنگایانەی کە پێش شەڕ ئۆتۆمبێل و ماتۆرسکیلیان هاوردە کردووە.

بەخشین لە سزای دارایی

ئەو ئۆتۆمبێل و ماتۆرسکیلانەی بەهۆی دۆخی شەڕەوە لە گەراج و پێشەنگاکان ماونەتەوە و نەفرۆشراون، هیچ سزایەکی دارایییان ناکەوێتە سەر.

هاوکاری کاسبکاران

ئەم بڕیارە لەبەر لێکەوتەکانی بارودۆخی شەڕی نێوان ئەمریکا و ئێران و کاریگەرییەکانی لەسەر کەسابەت و گوزەرانی خەڵک و بازرگانی دراوە.

ئەم ئاسانکارییە بۆ ماوەی یەک ساڵ لە ڕێکەوتی دەرچوونی فەرمانەکەوە بەردەوام دەبێت و ئامانج لێی کەمکردنەوەی بارگرانی داراییە لەسەر شانی خاوەن کارەکان.