SNN-
سەرۆکی یەکێتیی نیشتمانیی کوردستان لە ڕۆژی زمانی کوردیدا، جەخت لە پاراستن و پەرەپێدانی زمانی دایکی دەکاتەوە و بە قەڵای پارێزەری ناسنامەی نەتەوەیی ناوی دەبات.
زمان؛ قەڵای ناسنامە
بافڵ جەلال تاڵەبانی لە پەیامێکیدا بە بۆنەی ڕۆژی زمانی کوردییەوە، پیرۆزباییەکی گەرم ئاراستەی سەرجەم کوردستانیان دەکات. لە پەیامەکەیدا هاتووە، زمانی کوردی لای ئێمە تەنیا ئامرازێک نییە بۆ قسەکردن، بەڵکو سیمبوڵی مێژووی خۆڕاگری و ناسنامەی ڕەسەنی بوونمانە.
فرەچەشنی؛ بنەمای شارستانییەت
سەرۆکی یەکێتی ئاماژەی بەوە کردووە کە هەرێمی کوردستان بە فرەزمانی و فرەکولتووریی پێکهاتەکانی دەوڵەمەندە. لە دیدی بافڵ جەلال تاڵەبانیدا، پاراستنی زمانی کوردی و هاوکات ڕێزگرتن لە زمانی سەرجەم پێکهاتە ڕەسەنەکانی دیکەی کوردستان، بەشێکی دانەبڕاوە لە شارستانییەت و پایەیەکی گرنگی دەوڵەتدارییە.
پەیڕەوکردنی ڕێبازەکەی مام
لەکۆتایی پەیامەکەیدا، بافڵ جەلال تاڵەبانی جەختی کردووەتەوە کە لەسەر ڕێبازەکەی سەرۆک مام جەلال بەردەوام دەبن لە پاراستنی رەسەنایەتیی زمانی کوردی. هەروەها بەڵێنی پەرەپێدانی ئەم زمانەی لە ناوەندەکانی خوێندن و دامەزراوە فەرمییەکاندا دووپاتکردووەتەوە.
