پەرلەمانی عێراق کار لەسەر هەموارکردنی یاسای خانەنشینی دەکات.. تەمەنی خانەنشینی دەکرێتەوە بە 63 ساڵ

SNN-

لیژنەی یاسایی لە ئەنجومەنی نوێنەرانی عێراق ئاشکرای دەکات، هەوڵێکی ڕژدی پەرلەمانی هەیە بۆ پێداچوونەوە و هەموارکردنی یاسای خانەنشینیی یەکگرتوو، کە تێیدا تەمەنی خانەنشینی فەرمانبەران بۆ 63 ساڵ دەگەڕێندرێتەوە. ئەمەش لە چوارچێوەی پاکێجێکی یاساییدایە کە لیژنەکە لە قۆناغی ئێستادا کاریان لەسەر دەکات.

پاراستنی خاوەن ئەزموونەکان

محەمەد جاسم خەفاجی، ئەندامی لیژنەی یاسایی ڕایگەیاند، ئاراستەی گفتوگۆکانی پەرلەمان بەرەو گەڕاندنەوەی تەمەنی خانەنشینییە بۆ 63 ساڵ، ئەمەش بە مەبەستی چارەسەرکردنی دۆخی خاوەن ئەزموون و تواناکان تاوەکو دەوڵەت زۆرترین کات سوود لە لێهاتووییان ببێنێت. جەختیشی کردەوە کە پەسەندکردنی یاساکە پەیوەستە بە تەرخانکراوە داراییەکانی حکومەت و ڕێککەوتنی فراکسیۆنەکانەوە.

هاوکاری بۆ فەرمانبەرانی درەنگ دامەزراو

سائیر کەعبی، ئەندامی هەمان لیژنە ڕوونیکردەوە کە ئەم هەموارە دوو ڕووی هەیە؛ لایەنێکی ئەرێنی ئەوەیە یارمەتی ئەو فەرمانبەرانە دەدات کە درەنگ دامەزراون بۆ ئەوەی ئەو 3 ساڵە زیادەیە ببێتە هۆی تەواوکردنی مەرجەکانی خانەنشینی یان وەرگرتنی پاداشتی کۆتایی خزمەت.

دۆزینەوەی هاوسەنگی بۆ هەلی کاری گەنجان

لایەنی دووەمی یاساکە پەیوەستە بە مەترسیی کەمبوونەوەی هەلی کار بۆ دەرچووانی نوێ بەهۆی هێشتنەوەی فەرمانبەران بۆ تەمەنی 63ساڵ، کە ئەمەش پێویستی بە دروستکردنی هاوسەنگییەکی ورد هەیە لە نێوان مافی فەرمانبەران و گەنجاندا.

هەژمارکردنی خزمەتی کڕدراو

یەکێک لە بژاردە پێشنیازکراوەکان کە ئێستا گفتوگۆی لەسەر دەکرێت ئەوەیە، فەرمانبەران بتوانن لە بەرامبەر پێدانی لێبڕینەکانی خانەنشینی بۆ ماوەی سێ ساڵ، ئەو ماوەیەیان وەک خزمەت بۆ هەژمار بکرێت.